ვაკის რაიონის გამგეობის ბინათმესაკუთრეთა ამხანაგობების ხელშეწყობის პროგრამის ფარგლებში,  წყნეთში საცხოვრებელი კორპუსის კაპიტალური გამაგრების სამუშაოები დაიწყო. სამუშაოები დღეს ვაკის რაიონის გამგებელმა ნოდარ ტურძელაძემ დაათვალიერა.

კორპუსში იძულებით გადაადგილებული პირები ცხოვრობენ. მათი საცხოვრებელი სახლის კაპიტალური გამაგრების პროექტის ღირებულება 60 092 ლარია. ამ თანხის 90 % ვაკის რაიონის გამგეობამ, ხოლო 10 % დევნილთა სამინისტრომ დააფინანსა.

„ჩვენ რამდენიმე თვის წინ ვიყავით ადგილზე და მაშინ შევპირდით მოსახლეობას, რომ აუცილებლად დავეხმარებოდით ამ პრობლემის გადაჭრაში. სამუშაოების განხორციელება იყო სასწრაფო, რათა უზრუნველყოფილი ყოფილიყო მოქალაქეების უსაფრთხოება. დღეს სამუშაოები აქტიურ ფაზაშია. შესაბამისად, ცოტახანში მოსახლეობას, დაახლოებით 30 ადამიანს, ექნება გამაგრებული საცხოვრებელი სახლი. ამ კორპუსის გამაგრების გარდა ჩვენ გავაგრძელებთ სხვა ავარიული სახლების შესწავლას, შესაბამისი დასკვნების მომზადებას და შემდგომ პროცედურებს", - განაცხადა ვაკის რაიონის გამგებელმა, ნოდარ ტურძელაძემ.

საერთო ჯამში, 2017 წლის 16 თებერვლის მონაცემებით, ბინათმესაკუთრეთა ამხანაგობების ხელშეწყობის პროგრამის ფარგლებში, გამგეობის მიერ მიმდინარე წლის 1 იანვრიდან ამ დრომდე 53პროექტი დაფინანსდა. მათი საერთო ღირებულება 582 849 ლარს შეადგენს.