ევროკავშირი-საქართველოს საპარლამენტო ასოცირების კომიტეტის მუშაობამ ორდღიანი მუშაობა დღეს, ასოცირების შეთანხმების განხორციელების შესახებ ერთობლივი რეზოლუციის მიღებით დაასრულა, რომელშიც ასოცირების ხელშეკრულების, ვიზალიბერალიზაციის სამოქმედო გეგმის და თავისუფალი სავაჭრო შეთანხმების ფარგლებში საქართველოს მთავრობის მიერ წარმატებით განხორციელებული რეფორმებია ასახული.

„ერთობლივი რეზოლუცია, კიდევ ერთხელ აღნიშნავს საქართველოს ტერიტორიული მთლიანობის მიმართ ევროკავშირის მხარდაჭერას და გმობს რუსეთის მიერ განხორციელებულ პოლიტიკას. დოკუმენტში, ასევე, ხაზი გაესვა საქართველოში, ოქტომბერში ჩატარებული არჩევნების სამართლიანობას. რეზოლუცია ორივე მხარეს, საქართველოს და ევროკავშირს მოუწოდებს გააგრძელონ თანამშრომლობა და ხელი შეუწყონ საქართველოს კიდევ უფრო დაახლოებას ევროკავშირთან“, - განაცხადა დელეგაციის წევრმა ირინე ფრუიძემ.

თამარ ხულორდავას განცხადებით, ეს არის ძალიან პოზიტიური განცხადება, რომელიც კიდევ ერთხელ უსვამს ხაზს იმ თანამშრომლობას, რომელიც ჩვენ, ქართულ მხარეს ევროპარლამენტთან და ზოგადად, ევროკავშირთან გვაქვს.

„განცხადების ტექსტში, რომელიც როგორც ევროპარლამენტარების, ისე საქართველოს დელეგაციის უმრავლესობის მხრიდან იქნა მხარდაჭერილი, ხაზგასმით არის აღნიშნული ის პროგრესული ცვლილებები, რაც ქვეყანაში ბოლო წლების განმავლობაში განხორციელდა და ის გეგმები სწორად და პოზიტიურად არის შეფასებული რომელიც ჩვენ ევროინტეგრაციის გზაზე გვაქვს“, - განაცხადა თამარ ხულორდავამ.

„რეზოლუცია მივიღეთ თითქმის ერთხმად. იყო განსხვავებული აზრები კონკრეტულ საკითხებთან დაკავშირებით, მაგრამ მნიშვნელოვანი მომენტი - ტერიტორიული მთლიანობის მხარდაჭერა ჩვენი ქვეყნის, ასევე მხარდაჭერა იმ რეფორმების, რომელიც დაკავშირებულია ღრმა და ყოვლისმომცველ სავაჭრო ხელშეკრულებასთან და არჩევნებიც, რომელიც ჩატარდა 2016 წელს საქართველოში ესეც პოზიტიურად იყო შეფასებული“, - განაცხადა სხდომის დასრულების შემდეგ ბექა ნაცვლიშვილმა.