ტელეკომპანია ”იმედის” ყოფილი ჟურნალისტი გურამ როგავა აზერბაიჯანის საგარეო საქმეთა სამინისტრომ ”შავი სიიდან” ამოიღო. ამის შესახებ ”რია ნოვოსტის” უწყების ოფიციალურმა წარმომადგენელმა ჰიქმეთ გაჯიევმა განუცხადა.

ბაქომ 2013 წელს გამოაქვეყნა უცხო ქვეყნების მოქალაქეების ”შავი სია”, რომლებიც აზერბაიჯანის ხელისუფლებასათან შეუთანხმებლად არაღიარებული მთიანი ყარაბაღის რესპუბლიკის ტერიტორიაზე იმყოფებოდნენ.  

”საქართველოს მოქალაქემ გურამ როგავამ აზერბაიჯანის საგარეო საქმეთა სამინისტროს” ”შავი სიიდან” მისი გვარის ამოღების თხოვნით მიმართა. მან განაცხადა, რომ პატივს სცემს აზერბაიჯანის ტერიტორიულ მთლიანობასა და სუვერენიტეტს და აღნიშნა, რომ მთიან ყარაბაღში ჩასვლისას შედეგებზე არ უფიქრია... მივიღეთ გადაწყვეტილება ”შავი სიიდან” მისი გვარის ამოღების შესახებ”, - განაცხადა გაჯიევმა.

გურამ როგავა ტელეკომპანია ”იმედში” მუშაობისას არაღიარებული მთიანი ყარაბაღის რესპუბლიკის ტერიტორიაზე პროფესიული მუშაობის შესასრულებლად იმყოფებოდა.  ჟურნალისტი ამჟამად საზოგადოებრივ მაუწყებელში მუშაობს.