საქართველოს პარლამენტის თავმჯდომარე ირაკლი კობახიძე უზბეკეთის რესპუბლიკის პარლამენტის (ოლი მაჯლისის) თავმჯდომარის პირველ მოადგილეს, სოდიკ საფაევს შეხვდა.

სოდიკ საფაევმა საქართველოს პარლამენტის თავმჯდომარეს ვიზალიბერალიზაცია მიულოცა.

 უზბეკეთის პარლამენტის თავმჯდომარის პირველმა მოადგილემ ირაკლი კობახიძეს უზბეკეთში მიმდინარე პროცესები და ოლი მაჯლისის საქმიანობა გააცნო. თავის მხრივ, ირაკლი კობახიძემ საქართველოში მიმდინარე რეფორმებზე ისაუბრა, მათ შორის, ყურადღება გამახვილდა საჯარო მმართველობის რეფორმაზე.

მხარეებმა ორმხრივ ურთიერთობებზე ისაუბრეს. საქართველოს პარლამენტის თავმჯდომარემ ორ ქვეყანას შორის სავაჭრო-ეკონომიკურ სფეროში თანამშრომლობის მნიშვნელობას გაუსვა ხაზი, რადგან, მისი  განცხადებით, ამ მიმართულებით თანამშრომლობის განვითარებას ჩვენი ქვეყნის გეოგრაფიული მდებარეობა, საკანონმდებლო ბაზა და ბიზნეს-გარემო უწყობს ხელს. საქართველოს პარლამენტის თავმჯდომარემ და სოდიკ საფაევმა რეგიონში სატრანსპორტო და ინფრასტრუქტურული პროექტების განვითარებაზე ისაუბრეს. ირაკლი კობახიძემ საქართველოს მთავრობის ოთხპუნქტიან გეგმაზეც ისაუბრა და აღნიშნა, რომ ქვეყანაში ინფრასტრუქტურა  გეგმის მიხედვით უმჯობესდება. მხარეებმა ისაუბრეს ანაკლიის ღრმაწყლოვანი პორტის მნიშვნელობის შესახებაც.

შეხვედრაზე ხაზგასმით აღნიშნეს, რომ  მნიშვნელოვანია კულტურულ და სამეცნიერო სფეროებში თანამშრომლობაა, რადგან ორ ქვეყანას ერთმანეთთან ხანგრძლივი ისტორიული კავშირი აქვს.  შეხვედრაზე, ასევე,  გამოცდილების გაზიარების და სხვადასხვა მიმართულებით თანამშრომლობის პერსპექტივები განიხილეს.

მხარეებმა ხაზგასმით აღნიშნეს რეგიონის ქვეყნებთან ურთიერთობის განვითარების მნიშვნელობა.

შეხვედრაზე საქართველოში უზბეკეთის რესპუბლიკის დიპლომატიური წარმომადგენლობის გახსნის პერსპექტივა განიხილეს.

უზბეკეთის რესპუბლიკის  პარლამენტის თავმჯდომარის პირველმა მოადგილემ საქართველოს პარლამენტის თავმჯდომარე უზბეკეთში მიიწვია.