საპარლამენტო უმრავლესობის წევრი თამარ ჩუგოშვილი საქართველოსთან დაკავშირებით აშშ-ის "რესპუბლიკური" და "დემოკრატიული" პარტიის 30 კონგრესმენის პრეზიდენტ დონალდ ტრამპისადმი მიმართვას უპრეცედენტო ფაქტად აფასებს.

როგორც პარლამენტის პირველმა ვიცე-სპიკერმა ჟურნალისტებს განუცხადა, ეს არის მოწოდება პრეზიდენტის მიმართ, რომ დაუჭიროს მხარი საქართველოს ნატო-ში გაწევრიანებას. მისივე თქმით, ასევე ძალიან მნიშვნელოვანია თავისუფალი ვაჭრობის საკითხი, რომ ამერიკასა და საქართველოს შორის თავისუფალი ვაჭრობის შესახებ საუბარი დაიწყოს.

”პირველ რიგში, რა თქმა უნდა, ეს არის მოწოდება პრეზიდენტის მიმართ, დაუჭიროს მხარი საქართველოს ნატო-ში გაწევრიანებას. მეორე ძალიან მნიშვნელოვანი არის თავისუფალი ვაჭრობის საკითხი ანუ ის, რომ ამერიკასა და საქართველოს შორის თავისუფალი ვაჭრობის შესახებ საუბარი დაიწყოს. ამავე წერილში ხაზგასმულია ის მნიშვნელოვანი პროგრესი, რომელიც ჩვენ ქვეყანას აქვს უკანასკნელი წლების განმავლობაში და ის ძალიან მნიშვნელოვანი კონტრიბუცია და წვლილი, რომელიც საქართველოს ტერორიზმთან ბრძოლაში და ზოგადად, გლობალური უსაფრთხოების საკითხებში შეაქვს. ასე რომ, როგორც შინაარსობლივად იმ მესიჯების გათვალისწინებით, რაც ამ წერილშია მოცემული, ასევე თავად ის ფაქტი, რომ სულ უფრო იზრდება კონგრესში საქართველოს მხარდამჭერ კონგრესმენთა რაოდენობა, არის ძალიან მნიშვნელოვანი. დარწმუნებული ვარ, რომ სამომავლოდ, ეს ძალიან შეუწყობს ხელს როგორც თავისუფალი ვაჭრობის შესახებ მოლაპარაკებების წინ წაწევას, ასევე კიდევ უფრო სამომავლო პერსპექტივაში საქართველოს ნატო-ში გაწევრიანებას. ჩვენ ყველამ ვიცით, რომ ამერიკის პოზიცია იქნება გადამწყვეტი ნატო-ში წევრობასთან დაკავშირებით”, - აღნიშნა ჩუგოშვილმა.

ცნობისთვის, აშშ-ის წარმომადგენელთა პალატის 30-მა კონგრესმენმა აშშ-სა და საქართველოს შორის დიპლომატიური ურთიერთობების 25 წლისთავისა და ორ ქვეყანას შორის მტკიცე სტრატეგიული პარტნიორობის აღსანიშნავად, დღეს, საქართველოს მხარდამჭერი წერილით პრეზიდენტ დონალდ ტრამპს მიმართა. კონგრესმენები აშშ-ს პრეზიდენტს მოუწოდებენ, საქართველოსთან თავისუფალი ვაჭრობის შეთანხმების გაფორმების თაობაზე მოლაპარაკებების დაწყებისაკენ და ამ მიზნით ვაჭრობისა და ინვესტიციების საკითხზე მაღალი დონის დიალოგის გაღრმავებისაკენ. კონგრესმენები ასევე მოუწოდებენ აშშ-ის პრეზიდენტს განაგრძოს ნატო-ში გაწევრიანების გზაზე საქართველოს მხარდაჭერა. წერილში ხაზგასმულია ორ ქვეყანას შორის არსებული ძლიერი სტრატეგიული პარტნიორობა და აშშ-ის მხრიდან ამ პარტნიორობის კიდევ უფრო გაღრმავების საჭიროება.