საქართველოს 20-წლამდელ მორაგბეთა ნაკრებმა საქართველოში გუშინ დაწყებული მსოფლიოს ჩემპიონატი საკმაოდ ხარისხიანი, მაგრამ წარუმატებელი თამაშით გახსნა. უმცროსი ბორჯღალოსნები ავჭალის სარაგბო სტადიონზე, ჯგუფური ეტაპის პირველი ტურის შეხვედრაში არგენტინის ნაკრებთან დამარცხდნენ.

პირველ ტაიმში ქართველმა ახალგაზრდებმა მეტოქის 3 ლელოს და 1 გარდასახვას, გელა აფრასიძის 4 ზუსტი საჯარიმო დარტყმით უპასუხეს და შესვენებაზე 5-ქულიანი ჩამორჩენით (12:17) გავიდნენ.

მეორე ტაიმში ორივე ნაკრებმა 2-2 ლელო მიითვალა, თავისი ზუსტი გარდასახვებით. არგენტინელებმა კი პირველი ნახევრის უპირატესობა 2 ჯარიმის ხარჯზე კიდევ 6 ქულით გაზარდეს და საქართველოს 20-წლამდელთა ნაკრებმა საბოლოოდ 26:37 წააგო.

უმცროს ბორჯღალოსანთაგან ლელოები გიორგი კვესელაძემ და უჩა ჭეიშვილმა გაიტანეს. პირველად ბურთი აფრასიძემ გარდასახა, ხოლო მეორედ - გიორგი გოგოლაძემ.

მატჩის მიწურულს, ქართველ მორაგბეებს რეალური შანსი ჰქონდათ, კიდევ ერთხელ შეეტანათ ბურთი მეტოქის ჩათვლის მოედანში, რაც 7 ქულაზე ნაკლებით წაგების და შესაბამისად, ბონუს-ქულის მოპოვების საშუალებას მისცემდათ, მაგრამ რამდენიმე ხელსაყრელი ეპიზოდი ვერ გამოიყენეს.

საქართველო და არგენტინა C ჯგუფში გამოდიან. იქვე არიან სამხრეთ აფრიკისა და საფრანგეთის ახალგაზრდული ნაკრებებიც, რომლებიც ჩემპიონატის საწყის შეხვედრაში ერთმანეთს დაუპირისპირდნენ და ფრედ - 23:23 ითამაშეს.

გუშინვე, პირველი ტურის კიდევ ოთხი მატჩი გაიმართა. A ჯგუფში ინგლისმა 57-ქულიანი უპირატესობით აჯობა სამოას, ანგარიშით 74:17, ხოლო ავსტრალიამ უელსი დაამარცხა - 24:17.

B ჯგუფში ახალმა ზელანდიამ შოტლანდიას მოუგო - 42:20. დღის მთავარი სენსაცია კი იტალიის 20-წლამდელთა ნაკრებმა შემოგვთავაზა ირლანდიის ძლევით - აპენინელებმა 22:21 იმარჯვეს.

მსოფლიოს 20-წლამდელთა ჩემპიონატში, რომელსაც თბილისი და ქუთაისი მასპინძლობს, მონაწილეობას 12 ქვეყნის ასაკობრივი ნაკრები იღებს.

ჯგუფური ეტაპის მეორე ტურის შეხვედრები 4 ივნისს გაიმართება და საქართველოს ნაკრები ისევ ავჭალის სტადიონზე, სამხრეთ აფრიკას დაუპირისპირდება.

ლუკა ქარსალაძე, პრაიმნიუსჯორჯია