აზერბაიჯანელი ჟურნალისტის აფგან მუხთარლის საქმის გამოძიებას, საგარეო და უსაფრთხოების საკითხებში ევროკავშირის უმაღლესი წარმომადგენლის ფედერიკა მოგერინის ოფისიც ეხმაურება. განცხადებას საქრათველოში ევროკავშირის წარმომადგენლობა ავრცელებს.

„საქართველოში მცხოვრები აზერბაიჯანის მოქალაქეების, მათ შორის, ადამინის უფლებების დამცველების გატაცება და თვითნებურად, უკანონოდ დაკავება - როგორც ეს იყო გაცხადებული და რასაც მოჰყვა მათი აზერბაიჯანში დაპატიმრება და სისხლისსამართლებრივი დევნა, სწრაფ, სიღრმისეულ და გამჭვირვალე გამოძიებას მოითხოვს“, - ნათქვამა განცხადებაში.

ევროკავშირის უმაღლესი წარმომადგენელი აზერბაიჯანის ხელისუფლებას მათ მიერ, აღებული საერთაშორისო ვალდებულებების შესრულებისკენ მოუწოდებს.

„აზერბაიჯანმა სასწრაფოდ უნდა გადახედოს ყველა იმ დაპატიმრებული პირის საქმეს, სადაც პატიმრობა ადამიანის ძირითადი უფლებების, მათ შორის, გამოხატვის თავისუფლების განხორციელებას უკავშირდება და დაუყოვნებლივ გაათავისუფლოს ყველა ეს ადამიანი აზერბაიჯანის მიერ აღებული საერთაშორისო ვალდებულებების შესაბამისად. მოველით, რომ დაცული იქნება კანონის მოთხოვნები და სამოქალაქო და პოლიტიკური უფლებები, ასევე, უზრუნველყოფილი იქნება უცხო ქვეყნის იმ მოქალაქეების უფლებები, რომლებიც ქვეყანაში კანონიერად ცხოვრობენ“, - ნათქვამია ფედერიკა მოგერინის პრესმდივნის განცხადებაში.