"საქართველოს პრეზიდენტს ვთხოვ, გამოიყენოს ყველა საშუალება და ხერხი და აფგან მუხტარლის საკითხი ქვეყნის დღის წესრიგში დააყენოს", - ამის შესახებ მუხტარლის მეუღლემ, ლეილა მუსტაფაევამ გიორგი მარგველაშვილთან შეხვედრის დაწყებამდე განაცხადა.

როგორც აზერბაიჯანელი ჟურნალისტის მეუღლე აღნიშნავს, გამოძიებით უკმაყოფილოა.

„მადლობა მინდა გადავუხადო პრეზიდენტს, მის მიერ დაფიქსირებული პოზიციის გამო, განსხვავებით სხვა ოფიციალური უწყებებისგან. მაგალითად, პრემიერი და სხვა ოფიციალური პირები იმეორებდნენ იმავეს, რასაც აზერბაიჯანის ოფიციალური მხარე ავრცელებდა. რაც შეეხება გამოძიებას, ახალი არაფერია ქართველი სამართალდამცველების მხრიდან, გარდა რამდენიმე ვიდეო ჩანაწერისა და რამდენიმე მოწმის დაკითხვისა. ჩვენ არ ვართ კმაყოფილი ამ გამოძიებით, ვინაიდან უკვე ერთი თვე გავიდა და არანაირი სერიოზული შედეგი არ დადებულა. მათ ვერ მოძებნეს პირები, ვინც მუხტარლი გაიტაცა. ვერ იპოვეს ის პირიც, რომელმაც შეუკვეთა ეს გატაცება. ეს ნიშნავს იმას, რომ ხელს აფარებენ ამ პირებს, მიუთითებს იმაზე, რომ სახელმწიფო უწყებები არიან ჩართული მის გატაცებაში. პრეზიდენტს ვთხოვ, გამოიყენოს ყველა საშუალება და ხერხი. სახელმწიფო უწყებებს თუ პრეზიდენტის ადმინისტრაციას აქვს შესაძლებლობა, ეს საკითხი ქვეყნის დღის წესრიგში დააყენოს“ - აღნიშნა მუსტაფაევამ.