თბილისის მერი დედაქალაქის განვითარების გენგეგმაში სასაფლაოების საკითხთან დაკავშირებით, ჟურნალისტების კითხვას პასუხობს.

„როცა გარდავიცვლებით, ყველა დავიმარხებით, ეს არის ჩემი პასუხი. რა უნდა გითხრათ სასაფლაოებთან დაკავშირებით“, - განაცხადა  მერმა.

მისი განმარტებით, გენერალური განვითარების გეგმა  სასაფლაოების ტერიტორიებსაც ითვალისწინებს. 

„მნიშვნელოვანია ის, რომ გენგეგმაში მოცემულია ის ტერიტორიები, რომელიც მომავალში სასაფლაოებისთვის იქნება გამოყენებული, ასევე სხვა სარიტუალო ღონისძიებებისთვის. ასე რომ ეს საკითხი გეგნეგმაში გათვალისწინებულია, ისევე როგორც სხვა ყველა მნიშვნელოვანი საკითხი. ასე რომ, დეფიციტი არ გვექნება”, - განაცხადა დედაქალაქის მერმა. 

თბილისის გენგეგმა მერიას გეგმაზე მომუშავე სპეციალისტებმა გუშინ ჩააბარეს. დედაქალაქის მერს იმედი აქვს, რომ საშემოდგომო სესიაზე თბილისის საკრებულო დოკუმენტს დაამტკიცებს.

თბილისის მიწათსარგებლობის გენერალური გეგმის ავტორები დედაქალაქიდან რკინიგზის გადატანას მხარს უჭერენ. გეგმის მიხედვით, საცობების განტვირთვის მიზნით სპეციალური სააგენტო უნდა შეიქმნას. გეგმაში, ასევე, ტაქსებისთვის რეგულაციების დაწესებაზეც წერია. გენგეგმის თანახმად, მტკვარზე შესაძლოა წყლის ტრანსპორტმა იმოძრაოს, ასევე მარცხენა სანაპიროზე მსუბუქი ავტომანქანების მოძრაობა შეიძლება აიკრძალოს.