დარწმუნებული ვარ, ჩვენ დავუბრუნდებით შრომას, შრომა ეს არის მკურნალი ადამიანისა, - ამის შესახებ საქართველოს კათოლიკოს-პატრიარქმა სნოში განაცხადა, სადაც 34 ნომრიანი სასტუმრო გაიხსნა.

„ადამიანი შეიძლება დაეცეს, მაგრამ უნდა იმდენი ძალა მოიკრიბოს, რომ ადგეს და გააგრძელოს თავისი გზა. ჩვენ ვიმყოფებით მეტად მნიშვნელოვან რეგიონში, ეს არის სნოს ხეობა, ხევი, რომელიც იცავს საქართველოს ჩრდილოეთი მხარედან. 

ეს სასტუმრო აშენდა არა იმიტომ, რომ ვიღაცამ ისარგებლოს და მატერიალური სარგებელი ნახოს, ეს აშენდა იმისათვის, რომ გაიმეოროთ სხვა რეგიონებში მსგავსი მოქმედება. ჩვენ არ უნდა ვიფიქროთ იმის შესახებ, ვინ დაგვეხმარება, ვინ რას მოგვცემს, უნდა ვიფიქროთ იმის შესახებ, ჩვენ რას მივცემთ სამშობლოს, რას გავაკეთებთ. მე ვაჩვენე მაგალითი ამისი. საქართველო ისეთი ქვეყანაა, რომ ყველაფერი მოდის, მოსავალი, ჰაერი, ყველაფერი მოგვცა ჩვენმა ღმერთმა, ამიტომ ვისარგებლოთ ამ ღვთის წყალობით.

დარწმუნებული ვარ, რომ ჩვენ დავუბრუნდებით შრომას, შრომა ეს არის მკურნალი ადამიანისა, მადლობელი ვარ ყველასი, ვინც მობრძანდა დღეს აქ“,- აღნიშნა პატრიარქმა.

სნოში, მრევლის შემოწირულობით, 34-ნომრიანი სასტუმრო გაიხსნა. ღონისძიებას საქართველოს პატრიარქი, პრეზიდენტი, პრემიერ-მინისტრი, პარლამენტის თავმჯდომარე, დეპუტატები და მინისტრთა კაბინეტის წარმომადგენლები ესწრებიან. 

სასტუმრო პილიგრიმებს მოემსახურება და შემოსული თანხა ადგილობრივებს მოხმარდებათ.