პარიზში 94 წლის ასაკში გარდაიცვალა კოსმეტიკური კომპანია L'Oreal-ის დამფუძნებლის ქალიშვილი და მსოფლიოს უმდიდრესი ქალი ლილიან ბეტანკური.

Forbes-ის მონაცემებით, ბეტანკური პლანეტის უმდიდრეს ადამიანთა შორის 39,5 მლრდ დოლარის შემოსავლით მე-14 ადგილს იკავებდა.

ლილიან ბეტანკური დაიბადა 1922 წელს პარიზში ეჟენ შიულეს ოჯახში, რომელმაც 1909 წელს კომპანია L'Oreal-ი დააფუძნა.

1957 წელს მამის გარდაცვალების შემდეგ ლილიან ბეტანკურს მამის კოსმეტიკური კომპანია მემკვიდრეობით ერგო და L'Oreal-ის მთავრი აქციონერი გახდა.

ბეტანკური 2011 წელს შეზღუდული შესაძლებლობის მქონე პირად მას შემდეგ აღიარეს, რაც ექიმებმა მას ფსიქიკური აშლილობისა ალცჰეიმერის დიაგნოზი დაუსვეს. სასამართლომ კი ის ოჯახს მეურვეობის ქვეშ გადასცა.

თავად მილიარდერი ექიმებისა და სასამართლოს დასკვნებს არ ეთანხმებოდა და ქვეყნის დატოვებასაც კი აპირებდა, თუ კი მას ქალიშვილს ფრანსუაზა ბეტანკურ-მეიერსს მეურვეობის ქვეშ გადასცემდნენ, რადგან ქალიშვილთან მას კონფლიქტი ჰქონდა.

2012 წელს ლილიან ბეტანკური L'Oreal-ის დირექტორთა საბჭოდან გარიცხეს. მას შემდეგ ის საჯაროდ იშვიათად ჩნდებოდა.

2010 წელს ბეტანკური ექს-პრეზიდენტ ნიკოლა სარკოზის საარჩევნო კამპანიის დაფინანსების გამო პოლიტიკური სკანდალის ცენტრში აღმოჩნდა.

გამომძიებლების აზრით, 2007 წელს წინასაარჩევნო კამპანიის დროს სარკოზიმ ლილიან ბეტანკურისგან მოტყუების გზით თანხა მიიღო.

თავად სარკოზი მისი მისამართით გამოთქმულ ბრალდებებს უარყოფდა. 2013 წელს სარკოზის წინააღმდეგ საქმე დაიხურა.