2015 წლის 1-ელი ნოემბრის მონაცემებით, აჭარის ფინანსთა და ეკონომიკის სამინისტროს მიერ 87 ობიექტი იქნა პრივატიზებული. აჭარის მთავრობის მეთაურის არჩილ ხაბაძის განმარტებით, საანგარიშო პერიოდში საპრივატიზებო ღირებულებამ 19 მლნ 820 ათასი ლარი შეადგინა.

მიმდინარე წელს, ყველაზე ძვირად სამინისტრომ პირობებიან აუქციონზე, ბათუმში, კახაბრის დასახლებაში მდებარე 29445 კვ/მ არასასოფლო-სამეურნეო დანიშნულების მიწის ნაკვეთი 2 მლნ 91 ათას დოლარად გაასხვისა, რომლის მფლობელიც კომპანია ”ეიერ-მერიდიანი” გახდა. საპრივატიზაციო პირობების მიხედვით, ”ეიერ-მერიდიანი” ვალდებულია, აღნიშნულ ტერიტორიაზე არანაკლებ 220 ნომრიანი სასტუმრო, არანაკლებ 600  აპარტამენტი, სამორინე, საკონფერენციო დარბაზი, სპორტულ-გამაჯანსაღებელი ცენტრი ააშენოს და  არანაკლებ 13 000 კვ.მ მიწის ნაკვეთზე სარეკრიაციო ზონა მოაწყოს, ავტოსადგომითა და სხვადასხვა ტიპის კვების ობიექტებით.სახელშეკრულებო პირობების მიხედვითვე,  ობიექტი ექსპლუატაციაში ხელშეკრულების გაფორმებიდან 48 თვის ვადაში უნდა შევიდეს, რაც ინვესტორს პირობების მიხედვით, მინიმუმ 30 მლნ დოლარი დაუჯდება.

რაც შეეხება უპირობო აუქციონებს ყველაზე ძვირად, 1 მლნ 10 ათას დოლარად სამინისტრომ ბათუმში, მწვანე კონცხზე განთავსებული შენობა-ნაგებობა და მასზე მიმაგრებული არასასოფლო-სამეურნეო დანიშნულების მიწის ნაკვეთი გაასხვისა. ობიექტის მფლობელი „ბიზნეს დეველოპმენტი“ გახდა.