მეწარმეობის განვითარების საერთაშორისო პრაქტიკის გაცნობა, საუკეთესო მაგალითების საქართველოს რეალობაზე მორგება და ქმედუნარიანი მექანიზმების დანერგვა, სწორედ აღნიშნული თემები წარმოადგენდა მსჯელობის საგანს 15-18 ნოემბერს პოლონეთში განხორციელებული სამუშაო ვიზიტისას.

 ოთხ დღიანი ვიზიტი პოლონური მხარის მოწვევით განხორციელდა.

მეწარმეობის განვითარების სააგენტოს დირექტორის, ანა კვარაცხელიას ხელმძღვანელობით შეხვედრებში მონაწილეობდნენ სააგენტოს, ასევე ინოვაციებისა და ტექნოლოგიების სააგენტოს წარმომადგენლები და იმერეთის გუბერნატორის მოადგილე, იოსებ ხახალეიშვილი.

მხარეებმა მცირე და საშუალო ბიზნესის მხარდასაჭერ კონკრეტულ ღონისძიებებზე იმსჯელეს და განიხილეს არსებული გამოწვევების გადაჭრის გზები. დისკუსიის ფორმატით განხილულ იქნა პოლონეთში მიმდინარე პროგრამები და შედეგები. ასევე დასახულ იქნა სამომავლო თანამშრომლობის პერსპექტივები. მეწარმეობის განვითარების სააგენტოსათვის ყოველი მსგავსი ხასიათის ვიზიტი პირველ რიგში ემსახურება თანამშრომელების მიერ მეტი ინფორმაციის მიღებას და უცხოელი პარტნიორების მხრიდან მეტი გამოცდილების გაზიარებას, რაც თავის მხრივ ხელს უწყობს ეფექტური პროგრამებისა თუ ინიციატივების განხორციელებას.

ოთხ დღიანი ვიზიტის ფარგლებში შეხვედრები შედგა პოლონეთის ეკონომიკის სამინისტროს, პოლონეთის მეწარმეობის განვითარების სააგენტოს, კვლევისა და განვითრების ეროვნულ ცენტრსა და სმოლნას მეწარმეობის ცენტრის წარმომადგენლებთან.