ვეტოს დაძლევაზე გადაწყვეტილებას მყარი არგუმენტების მოსმენის შემდეგ მივიღებთ, - ამის შესახებ ფრაქცია ”ქართული ოცნების” თავმჯდომარე მამუკა მდინარაძემ ჟურნალისტებს განუცხადა, როდესაც უპასუხა კითხვას, უნდა დაძლიოს თუ არა უმრავლესობამ პრეზიდენტის ვეტო ”მაუწყებლობის შესახებ” კანონპროექტთან დაკავშირებით. 

,,პარლამენტის თავმჯდომარემ განაცხადა, რომ შეხვდება მათ შორის მედიასაშუალებების წარმომადგენლებს. ამის შემდეგ იქნება მიღებული გადაწყვეტილება. რადგან ვაცხადებ, რომ ვეტოს დაძლევა არ არის თვითმიზანი, ვგულისხმობ, რომ ორივე პოზიციის მომხრეებს აქვთ მყარი არგუმენტები. მოვისმენთ კიდევ ერთხელ განსხვავებულ მოსაზრებებს და საბოლოო გადაწყვეტილება იქნება მიღებული, მათ შორის საუკეთესო ევროპული გამოცდილებიდან, საზოგადოებრივი მაუწყებლის და მედიასაშუალებების ინტერესებიდან გამომდინარე", - განაცხადა მამუკა მდინარაძემ.

„მაუწყებლობის შესახებ“ კანონპროექტზე პრეზიდენტის მოტივირებული შენიშვნები პარლამენტის ბიუროზე ინიცირებულია. 

პრეზიდენტის მიერ წარდგენილი პროექტის განხილვის კონკრეტული თარიღი ბიუროს დღევანდელ სხდომაზე არ განსაზღვრულა, თუმცა როგორც ითქვა, პარლამენტს განხილვის ვადა 26 იანვრის ჩათვლით აქვს. 

როგორც ცნობილია, პრეზიდენტმა მხარი არ დაუჭირა „მაუწყებლობის შესახებ“ კანონში განხორციელებულ ცვლილებებს. მისი მოტივირებული შენიშვნები ეხება ორ საკითხს: საზოგადოებრივი მაუწყებლის ეთერში კომერციული რეკლამის განთავსებას და ასევე სახელმწიფო შესყიდვებთან დაკავშირებულ ინიციატივას, რომელიც თავის მხრივ, საზოგადოებრივი მაუწყებლის მიერ გადაცემების პროგრამების შესყიდვას უკავშირდება.