ფილიპინების პრეზიდენტმა როდრიგო დუტერტემ სამხედროებს სთხოვა დახვრიტონ, თუ ის კონსტიტუციის დარღვევას დააპირებს და ხელისუფლებაში განსაზღვრულ ვადაზე მეტ ხანს დარჩება. მის მიმართვას პორტალი Rappler.com აქვეყნებს.

„თუ მე ხელისუფლებაში განკუთვნილ პერიოდზე მეტ ხანს დავრჩები და დიქტატორობას გადავწყვეტ, დამხვრიტეთ, არ ვხუმრობ. თუ გადავაჭარბებ ჩემს ვადას ერთი დღითაც კი, ფილიპინების შეიარაღებულ ძალებსა და  ეროვნულ პოლიციას ვთხოვ, უზრუნველყოს კონსტიტუციის დაცვა“, - განაცხადა დუტერტემ სამხედრო ბაზაზე ვიზიტის დროს.

დუტერტემ, რომელმაც პრეზიდენტის პოსტი 2016 წელს დაიკავა, სახელი ნარკოდამოკიდებულებისა და ნარკოტიკების გამავრცელებლების წინააღმდეგ ბრძოლით გაითქვა. მისი ხელისუფლებაში მოსვლის დღიდან ფილიპინებში სასამართლო განხილვების გარეშე მოკლულია ნარკოტიკებთან დაკავშირებული 2 400 ადამიანი. საერთაშორისო თანამეგობრობამ არაერთგზის დაგმო ფილიპინელი ძალოვანების მუშაობის მეთოდები.