აღიარონ თემირლანის უდანაშაულობა და გადადგეს გომელაურის კლანი თავისი სპეცრაზმით, - აცხადებს პანკისის ხეობაში ჩატარებული სპეცოპერაციის შედეგად დაღუპული თემირლან მაჩალიკაშვილის მამა მალხაზ მაჩალიკაშვილი. ის პანკისის მოსახლეობის საგანგებო მიმართვას ეთანხმება და აცხადებს, რომ მისი შვილის  უდანაშაულობა უნდა იქნეს აღიარებული.

„ჩემი მოთხოვნაა, რომ ჩემს შვილს მიენიჭოს დაზარალებულის სტატუსი, მოშორდეს ეს ლაქა და დაღი, რომელიც დაადეს. აღიარონ თემირლანის უდანაშაულობა. ასევე გადადგეს გომელაურის ეს კლანი თავისი სპეცრაზმით. მერე მთელი ეს ბანდა წარდგნენ სასამართლოს წინაშე“, - განაცხადა მალხაზ მაჩალიკაშვილმა.

ის მთავარ პროკურორთან შეხვედრას და არსებულ კითხვებზე პასუხებს მოითხოვს. მისივე თქმით, ოჯახს ამ დრომდე სახელმწიფო უწყებებიდან არავინ დაკავშირებია.

როგორც ცნობილია, მალხაზ მაჩალიკაშვილი სუსის ხელმძღვანელთან, ვახტანგ გომელაურთან შეხვედრასაც ითხოვდა.

პანკისის ხეობის მოსახლეობამ დუისში, თემირლან მაჩალიკაშვილის სახლში საგანგებო განცხადება გააკეთა და მთავარ პროკურორ ირაკლი შოთაძესთან შეხვედრა მოითხოვა. 

მათი განცხადებით, უმჯობესი იქნება შოთაძე პირადად ჩავიდეს ხეობაში, წინააღმდეგ შემთხვევაში ისინი პროკურატურაში თავად გეგმავენ ჩასვლას.

უხუცესების განცხადებით, გამოძიება ჭიანურდება და არსებულ კითხვებს მაქსიმალურად სწრაფად უნდა გაეცეს პასუხი. 

შეგახსენებთ, თემირლან მაჩალიკაშვილი პანკისში სპეცოპერაციის დროს დაიჭრა დაუგონო მდგომარეობაში იმყოფებოდა, 11 იანვარს კი საავადმყოფოში გარდაიცვალა.