2015 წელს თამბაქოზე აქციზის გადასახდის 2-ჯერ ზრდა თამბაქოს ინდუსტრიას გაყიდვები არ შეუმცირა, თუმცა მომხმარებელთა ნაწილი მაღალი საფასო სეგმენტიდან შედარებით დაბალი საფასო სეგმენტის თამბაქოს მოხმარებაზე გადავიდა. როგორც JTI Caucasus-ის კორპორაციულ საკითხთა და კომუნიკაციების დირექტორი ივანე ხასია განმარტავს, ამ ეტაპისთვის ძნელია იმის თქმა, თუ რა ზემოქმედება ექნება აქციზის ზრდას გაყიდვებზე და როგორი იქნება მომხმარებლების ქცევა.

„თუმცა წლევანდელ წელს თუ გავანალიზებთ და შევხედავთ რა სიტუაცია მივიღეთ, ძირითადი ტრენდი იყო ის, რომ ბაზარზე რადიკალური ცვლილებები არ დაფიქსირებულა. თუმცა შეიმჩნეოდა სხვადასხვა სეგმენტებს შორის, ანუ უფრო მაღალი საფასო სეგმენტიდან დაბალ საფასო სეგმენტზე გადმორთვა. ეს თავისთავად საბიუჯეტო შემოსავლებზეც აისახება, რადგანაც ე.წ. ადვალური გადასახადი შევიდა ძალაში, რომელიც სწორედ საცალო გაყიდვებიდან გვეკისრება და რაც უფრო ნაკლები ღირებულების ბრენდი იყიდება, მით უფრო ნაკლები შედის ბიუჯეტში“, აღნიშნა JTI Caucasus-ის კორპორაციულ საკითხთა და კომუნიკაციების დირექტორმა.

ივანე ხასია ამბობს, რომ გაზრდილი აქციზის გადასახადის ფონზე რეგიონის ქვეყნებთან მიმართებაში შეიცვლება ფასიც.

„აქციზის გადასახადი 2016 წლის 1-ელი იანვრიდან იზრდება, ორივე კომპონენტში სამწუხაროდ. ანუ სპეციფიკური აქციზის ნაწილში ზრდა 20 თეთრის მოცულობით იქნება, საერთო ჯამში ერთ კოლოფზე გამოვა 1,1 ლარი. პლუს ამას ემატება გაზრდილი ადვალური გადასახადი, რომელიც 5%-დან 10 %-მდე გაიზრდება. შესაბამისად დღეისათვის მნიშვნელოვანი სხვაობა გქვონდა იგივე სომხეთის ბაზართან მიმართებაში და 1-ელი იანვრიდან ეს სხვაობა კიდევ უფრო გაიზრდება. მართალია კონკრეტულ ბრენდებზე ფასების სხვაობა განსხვავებულია, თუმცა დაახლოებით 20 ცენტიდაც ზემოთ მერყეობს ეს სხვაობა“, აცხადებს ხასია.

მისივე ინფორმაციით, თამბაქოს ინდუსტრიას სახელმწიფო ბიუჯეტში 600 მლნ ლარამდე შეაქვს.