აშშ-ის სახელმწიფო მდივანმა რექს ტილერსონმა რუსეთის ყოფილ ჯაშუშზე სერგეი სკრიპალზე თავდასხმაში დაადანაშაულა.

„მსგავს თავდასხმას, სუვერენული სახელმწიფოს ტერიტორიაზე მოქალქის მკვლელობის მცდელობას არასდროს აქვს გამართლება და ჩვენ აღშფოთებულნი ვართ, რომ რუსეთი მსგავსი ქმედებების დემონსტრირებას ისევ ახდენს. უკრაინიდან სირიამდე, ახლა კი დიდ ბრიტანეთამდე, რუსეთი განაგრძობს იყოს უპასუხისმგებლო ძალა, რომელსაც მსოფლიოსთვის მოაქვს არასტაბილურობა, რომელიც მოქმედებს ღიად და გაუფრთხილებლად სხვა ქვეყნების სუვერენიტეტისა და საკუთარი მოქალაქეების წინააღმდეგ“, - განაცხადა ტილერსონმა.

მისივე თქმით, დიდი ბრიტანეთის პრემიერ-მინისტრის ტერეზა მეის განცხადება სკრიპალის მკვლელობის მცდელობასთან რუსეთის კავშირის შესახებ აშშ-სთან იყო კოორდინირებული.

„შეერთებული შტატები კონტაქტში იყო ჩვენს მოკავშირეებთან გაერთიანებულ სამეფოში აღნიშნულ განცხადებამდე. იყო სატელეფონო ზარი სახელმწიფო მდივანსა და დიდი ბრიტანეთის საგარეო საქმეთა მინისტრს ბორის ჯონსონს შორის. სრულებით დარწმუნებულნი ვართ  დიდი ბრიტანეთის გამოძიებასა და მის შეფასებებში, რომ რუსეთი პასუხისმგებელია თავდასხმაში და ნერვულ-პარალიტური გაზის გამოყენებაში, რომელიც სოლსბერში გასულ კვირას მოხდა“, - აღნიშნა ტილერსონმა.

ბრიტანეთის პრემიერმა ტერეზა მეიმ განაცხადა, რომ სკრიპალის მოწამვლასთან კავშირი დიდი ალბათობით რუსეთის სახელწმიფოს აქვს.

მან რუსეთს დღეს საღამომდე მისცა დრო განმარტებების წარსადგენად, წინააღმდეგ შემთხვევაში რუსეთის წინააღმდეგ სერიოზული ზომების გატარების პირობა დადო. ხვალ სკრიპალის საქმესთან დაკავშირებით ბრიტანეთის უსაფრთხოების საბჭოს სხდომა გაიმართება, სადაც მეი პარლამენტს რუსეთის მიმართ დაგეგმილ ზომებს წარადგენს.