აშშ-ის პრეზიდენტს, დონალდ ტრამპს ჯერ კიდევ არ მიულოცია ვლადიმერ პუტინისთვის კიდევ ერთი ვადით საპრეზიდენტო არჩევნებში გამარჯვება.  

ტრამპის პრეს-მდივანმა, ჰოგან გიდლიმ ჟურნალისტებთან განაცხადა, რომ ვაშინგტონისთვის მისი გამარჯვება არ ყოფილა სიურპრიზი და შესაბამისად სატელეფონო ზარი კრემლში არ იყო დაგეგმილი.

მან ასევე დაამატა, რომ აშშ მზადაა მომავალშიც ითანამშრომლოს რუსეთთან იმ სფეროებში, სადაც ეს შესაძლებელი იქნება.

„ჩვენ შევთავაზებთ განვავითაროთ ჩვენი ურთიერთობები რუსეთთან, მაგრამ ვაიძულებთ მათ პასუხი აგონ, თუკი დაემუქრებიან ჩვენს ინტერესებს“ - განაცხადა გიდლიმ და დასძინა, რომ ჩვენ არ ვართ გაოცებულები საარჩევნო შედეგებით.

აღსანიშნავია, რომ დასავლელი ლიდერები არ ჩქარობდნენ რუსეთის პრეზიდენტისთვის მილოცვებს. პირველი ზარი კრემლში ჩინეთის სახალხო რესპუბლიკიდან იყო, შემდეგ აზერბაიჯანის, ბელორუსიის, სომხეთის, ვენგრიის, უზბეკეთის, ვენესუელის, თურქმენისტანის, ყაზახეთის, ტაჯიკეთის, კუბის, მალდივის და ყირგიზეთის ქვეყნებიდან. ასევე გამარჯვება მიულოცეს ე.წ. სამხრეთ ოსეთის და ოკუპირებული აფხაზეთის თვითგამოცხადებულმა ლიდერებმა.