ეს არის სწორი ნაბიჯი, - ასე აფასებს "ევროპული საქართველოს" ერთ-ერთი ლიდერი გიგა ბოკერია საქართველოს საგარეო საქმეთა სამინისტროს გადაწყვეტილებას, რომლის მიხედვითაც, ქვეყანა შვეიცარიის საელჩოს რუსეთის ინტერესების სექციის თანამშრომელს აძევებს.

მისი თქმით, ეს არის შედეგი იმ საზოგადოებრივი აზრის, რომელიც არსებობს დღეს საქართველოში. ბოკერის განცხადებით, ჯობდა ყოფილიყო უფრო ადრე, მაგრამ სჯობს გვიან, ვიდრე არასდროს.

„ახლა მთავარია, რომ ჩვენი მთავრობა, რომელიც აქამდე იყო არათანმიმდევრული ამ საკითხებში, რასაც ის საზიანო და მავნებლური წერილი ადასტურებს, დღეიდან მაინც აღარ დაუბრუნდეს იმ გზას, რომ რუსეთთან ენის მოჩლექვით ლაპარაკით შეიძლება ჩვენი ქვეყნის ინტერესების წინ წაწევა და არ დაუბრუნდეს იმ გზას, რომ ჩვენი საზოგადოება დააშინოს ომის შიშით", - განაცხადა ბოკერიამ.

ცნობისთვის, საგარეო საქმეთა სამინისტრო გამოხატავს სოლიდარობას გაერთიანებული სამეფოსადმი, იზიარებს გაერთიანებული სამეფოსა და საერთაშორისო საზოგადოების პოზიციას აღნიშნულ საკითხთან დაკავშირებით და შესაბამისად, მიუღებელ პიროვნებად აცხადებს საქართველოში შვეიცარიის კონფედერაციის საელჩოს რუსეთის ინტერესების სექციის თანამშრომელს და მოითხოვს მის მიერ საქართველოს დატოვებას 7 დღის ვადაში.