კიდევ ერთხელ შეგახსენებთ, რომ ეს პუწინი, ადამიანი ვლადიმირი არის უძლიერესი, ძალიან რთული და მძიმე, ანგარიშგასაწევი, - ამის შესახებ "პატრიოტთა ალიანსის" წევრმა ადა მარშანიამ პარლამენტში სიტყვით გამოსვლისას განაცხადა.

მისივე თქმით, რუსეთთან მიმართებაში პრაქტიკული და პრაგმატული პოლიტიკის გატარებაა საჭირო.

„ბატონო პრეზიდენტო უნდა გავიხედოთ ჩრდილოეთისკენაც დავინახოთ კარგად ის ჩვენი ჩრდილო მეზობელი. ბავშვობიდან ვიცნობთ მე მგონი ჩვენ კარგად ყველა. ზოგი სწავლობდა, ზოგიც ახლაც იქ სწავლობს და ცხოვრობს და მუშაობს სხვათაშორის. ძალიან ბევრი ჩვენი თანამემამულე იქ მოღვაწეობს და ბოლოს და ბოლოს ვიფიქროთ იმაზე, რომ ვერსად ვერ გავექცევით ჩვენ ერთმანეთს. გავატაროთ პრაქტიკული და პრაგმატული პოლიტიკა", - მიმართა ადა მარშანიამ გიორგი მარგველაშვილს.

მან აქვე გიგა ბოკერიას მიმართა და თხოვა, რომ ნუ ნერგავს საზოგადოებაში ანტირუსულ განწყობას.

"ძალიან გთხოვთ ბატონო ბოკერია, თქვენ ნუ ნერგავთ ჩვენს საზოგადოებაში, განსაკუთრებულად ახალგაზრდა თაობაში ანტირუსულ განწყობას. კი ბატონო პუტინი გძულდეთ, რა ჩემი საქმეა. გინდ გძულდეთ, გინდ არ გძულდეთ. საერთოდ პოლიტიკაში სიყვარული- სიძულვილი არ ვიცი მე. ბატონო ბოკერია, თქვენ სად გასწავლეს ეს ამბავი? პოლიტიკაში მე ვიცი ინტერესები. მე ვიცი პირველ რიგში ბატონო ბოკერია, რომ პუტინი არის პირველ რიგში რუსეთის ფედერაციის პრეზიდენტი. აი ეს მინდა შეგახსენოთ და ეს უნდა გახსოვდეთ თქვენ ყოველ წუთს და ისიც მინდა შეგახსენოთ, რომ მოსწონთ მათ თუ არა, მთელი მსოფლიო ამ ადამიანს ელაპარაკება. მაგრამ კიდევ ერთხელ შეგახსენებთ, რომ ეს პუწინი, ადამიანი ვლადიმირი არის უძლიერესი, ძალიან რთული და მძიმე, ანგარიშგასაწევი. ანგარიშგასაწევი ქვეყანა", - აღნიშნა ადა მარშანიამ.