მე გამოძიების დაწყებას გამოვრიცხავ, მაგრამ ჩვენ ვერ გამოვრიცხავთ იმას, რომ პარლამენტში დასმულ შეკითხვებზე პასუხების გაცემა საჭიროა, - ამის შესახებ საპარლამენტო უმრავლესობის ლიდერმა არჩილ თალაკვაძემ შეწყალებების საკითხზე პრეზიდენტ გიორგი მარგველაშვილის მიმართ გამოძიების დაწყებასთან დაკავშირებით განაცხადა.

მისი თქმით, პრეზიდენტის ადმინისტრაციის მხრიდან წარუმატებელი მცდელობა იყო, რომ ყურადღება პოლიტიკური შეფასებებიდან სხვა საკითხზე გადაეტანა.

„პარლამენტის თავმჯდომარემ თავისი განცხადება გუშინ საჯაროდ კიდევ ერთხელ ძალიან ზუსტად განმარტა და ის პოლიტიკური შეფასებები გაიმეორა, რაც პარლამენტში გააკეთა. ამ შეფასებებში ირაკლი კობახიძეს მთელი გუნდის მხარდაჭერა აქვს იმიტომ, რომ არგუმენტები, რომელიც მან ჩამოთვალა ხელის გულზეა და ეს კითხვები საზოგადოებასაც აქვს. ვფიქრობ, პრეზიდენტის ადმინისტრაციის მხრიდან წარუმატებელი მცდელობა იყო, რომ ყურადღება პოლიტიკური შეფასებებიდან სხვა საკითხზე გადაეტანა. კერძოდ, მათ გამოძიების დაწყების და იმპიჩმენტის თემის წამოწევა სცადეს, რაც ვერ შედგა. მე გამოძიების დაწყებას გამოვრიცხავ, მაგრამ ჩვენ ვერ გამოვრიცხავთ იმას, რომ პარლამენტში დასმულ შეკითხვებზე პასუხების გაცემა საჭიროა. კერძოდ, იმ პრაქტიკასთან დაკავშირებით, რომელიც შეწყალების თვალსაზრისით გვაქვს, როგორც რიცხვებში, ასევე კრიტერიუმებში, დემოკრატიული სახელმწიფოების პრაქტიკასთან ჩვენ ნამდვილად აცილება გვაქვს“, – განაცხადა არჩილ თალაკვაძემ.