საქართველოს სოფლის მეურნეობის მინისტრმა, ოთარ დანელიამ გურიის რეგიონის სახელმწიფო რწმუნებულ-გუბერნატორთან, გია სალუქვაძესთან ერთად,  ოზურგეთის მუნიციპალიტეტის  სოფელ ნატანებში დამშრობი სისტემების სარეაბილიტაციო სამუშაოები დაათვალიერა.

,,აღსანიშნავია, რომ დასავლეთ საქართველოში ძირითადად სადრენაჟე სამუშაოები ხორციელდება. ამ ეტაპზე, რეგიონში  40-მდე ერთეული სამელიორაციო ტექნიკა  ჩართულია სარეაბილიტაციო სამუშაოებში. აღნიშნული პროექტის დასრულების შემდეგ, 11 კმ- ზე მეტი სიგრძის სადრენაჟე არხი აღდგება და 480 ჰა ფართობის  სასოფლო-სამეურნეო დანიშნულებით გამოყენება იქნება შესაძლებელი“, - აღნიშნა ოთარ დანელიამ.

შპს ,,საქართველოს მელიორაციის“ გენერალურმა დირექტორმა, ლევან დვალმა სოფლის მეურნეობის მინისტრს სარეაბილიტაციო სამუშაოების მიმდინარეობის შესახებ დეტალური ინფორმაცია მიაწოდა.

პროექტის ფარგლებში, რიონი - ჩოლოქის მდინარეთა შორის მასივზე მოეწყობა მილხიდები, კაპიტალური ხიდი, გაიწმინდება კოლექტორი და შემკრები არხები.

სარეაბილიტაციო სამუშაოების დასრულების შემდეგ, სოფელ ნატანების 480 ჰა სასოფლო-სამეურნეო მიწის ფართობზე აღდგება სადრენაჟე მომსახურება. პროექტის  I ეტაპის  ღირებულება 483 410 ლარია. სამუშოები 2016 წლის ივლისში დასრულდება.

როგორც გურიის რეგიონის სახელმწიფო რწმინებულმა-გუბერნატორმა, გია სალუქვაძემ აღნიშნა, სამელიორაციო სამუშაოები რეგიონში აქტიურად მიმდინარეობს.

დღეისათვის, შპს „საქართველოს მელიორაცია“ გურიის რეგიონში სამელიორაციო ინფრასტრუქტურის სარეაბილიტაციო სამუშაოების  3,  საქართველოს მასშტაბით კი - 26  პროექტს ახორციელებს.

ნატანებში დამშრობი სისტემის სარეაბილიტაციო სამუშაოების მიმდინარეობას  სოფლის მეურნეობის მინისტრთან ერთად, სოფლის მეურნეობის მინისტრის მოადგილე ლევან დავითაშვილი და ადგილობრივი თვითმმართველობის ორგანოების  წარმომადგენლები გაეცნენ.