ძლიერი პაკეტი წევრობისთვის უფრო მომზადებულ საქართველოს ნიშნავს, - - ამის შესახებ კავკასიასა და ცენტრალურ აზიაში ნატო-ს გენერალური მდივნის სპეციალურმა წარმომადგენლმა ჯეიმს აპატურაიმ ბრიუსელში ქართველ ჟურნალისტებთან საუბრისას განაცხადა, სადაც ალიანსის წევრი ქვეყნების საგარეო საქმეთა მინისტრებმა „ღია კარის“ პოლიტიკასთან დაკავშირებით კომუნიკე მიიღეს.

მისივე განმარტებით, პროცესში ცვლილებები არ მომხდარა, თუმცა შეიცვალა ორი გარემოება. კერძოდ, წევრობისთვის პრაქტიკული მომზადების თვალსაზრისით, საქართველოს ყველა ინსტრუმენტი გააჩნია. ასევე, ვარშავის სამიტამდე საქართველოსთან თანამშრომლობის პრაქტიკული მხარდაჭერა გაიზრდება.

„ვარშავის სამიტამდე ჩვენ გავზრდით საქართველოსთან თანამშრომლობის პრაქტიკულ მხარდაჭერას, ყოვლისმომცველი პაკეტის გაძლიერებით. ამ პაკეტის განხორციელება აძლიერებს საქართველოს თავდაცვისუნარიანობას, რაც ხელს უწყობს საქართველოს წევრობისთვის მომზადებას. ასე რომ, ძლიერი პაკეტი წევრობისთვის უფრო მომზადებულ საქართველოს ნიშნავს“, - აღნიშნა ნატო-ს გენერალური მდივნის სპეციალურმა წარმომადგენელმა.

ნატო-ს 28 წევრი ქვეყნის საგარეო საქმეთა მინისტრებმა ერთობლივი კომუნიკე მიიღეს, რომლის მიხედვითაც, საქართველო გახდება ნატო-ს წევრი „მაპ“-ის, როგორც პროცესის განუყოფელი ნაწილის დახმარებით.

დღეს გამოქვეყნებული კომუნიკეს თანახმად, ჩრდილოატლანტიკური ალიანსი წევრობის სამოქმედო გეგმის შესაბამისად, საქართველოს მხარდაჭერასა და დახმარებას განაგრძობს.