საქართველოს ხელისუფლება აცხადებს, რომ  „გაზპრომთან“ ურთიერთობისას  პოლიტიკური რისკები არ არსებობს.

ამის შესახებ საუბარია ენერგეტიკის სამინისტროს იმ წერილში, რომელიც  მმართველ კოალიციაში შემავალ „რესპუბლიკურ პარტიას“ ოქტომბერში გაგზავნილი კითხვების  საპასუხოდ გაეგზავნა.

„რესპუბლიკური პარტიის“ კითხვები 11-პუნქტიანია და  მათგან ერთი პოლიტიკურ რისკებს ეხება.

„გათვლილია თუ არა ის პოლიტიკური ფასი, რომელიც შესაძლოა, გამოიწვიოს  არასაიმედო პარტნიორის („გაზპრომის“) მიერ მოწოდებული  გაზის  მოცულობის ზრდამ?“ - ნათქვამია „რესპუბლიკელების“ კითხვაში.

საპასუხოდ კი ენერგეტიკის სამინისტრო აცხადებს, რომ  „იმის გათვალისწინებით, რომ ამ ეტაპზე არ იგეგმება სახელმწიფოს მიერ „გაზპრომიდან“ კომერციული გაზის შესყიდვა, პოლიტიკური  რისკების მონეტიზაციის  საკითხი დღის წესრიგში არ დგას“.

„ თუმცა, გაზპრომის საქართველოს ბაზარზე შემოსვლის შემთხვევაში არსებობს მეთოდოლოგია ე.წ. stress tests, რომელიც გამოყენებული იქნა ენერგეტიკული გაერთიანების სხვადასხვა ქვეყნების რუსეთიდან მოწოდებული ბუნებრივ აირზე დამოკიდებულების შეფასების მიზნით. საქართველოც იყო ჩართული ამ პროცესში და დღევანდელი ფაქტობრივი მდგომარეობის გათვალისწინებით რისკები მინიმალურად შეფასდა,“ - ნათქვამი ენერგეტიკის სამინისტროს წერილში, რომელსაც ხელს  მინისტრის მოადგილე, მარიამ  ვალიშვილი აწერს.