პეკინში მსოფლიოში უდიდესი ახალი საერთაშორისო აეროპორტი ოფიციალურად გაიხსნა.

ჩინური მედიის ცნობით, პირველ რეისებს აეროპორტი უკვე ოთხშაბათს მოემსახურება.

მსოფლიოში უდიდესი საერთაშორისო აეროპორტის მშენებლობა, რომელიც ხუთი წლის წინ დაიწყო, მიმდინარე წლის 30 ივნისს დასრულდა.

აეროპორტი „დასინი“ მდებარეობს პეკინის სამხრეთით, ქალაქის ცენტრიდან 46 კმ-ში. ახალ აეროპორტს ექნება ოთხი ასაფრენ-დასაფრენი ბილიკი და წელიწადში 620 ათასამდე რეისს მიიღებს. 2025 წლისთვის აეროპორტის გამტარიანობამ, შესაძლოა, შეადგინოს 72 მლნ ადამიანი. ამის გარდა, 2025 წლისთვის პეკინის ახალი აეროპორტი, სავარაუდოდ, 2 მლნ ტონა ტვირთს გადაამუშავებს.

 „დასინი“ პოზიციონირებს, როგორც უმსხვილესი საერთაშორისო საჰაერო ჰაბი და ყველაზე რთული აეროპორტის ტერმინალის საინჟინრო პროექტი მსოფლიოში. მისი სახურავი უკვე აღიარებულია მსოფლიოში ყველაზე დიდ ფოლადის სახურავად, რომლის ფართობი  25 საფეხბურთო მოედნის ტოლია. სახურავის დიზაინის შექმნაში მონაწილეობდა მსოფლიოში ცნობილი არქიტექტორი და დიზაინერი ზაჰა ჰადიდი.