კინოთეატრ „ამირანთან“ აქციაზე ანა სუბელიანის დაშავების საქმეზე დაკავებულ შალვა შევარდნაძეს ​აღკვეთის ღონისძიების სახით პატიმრობა შეეფარდა.

პროკურატურამ ბრალდებულისთვის აღკვეთის ღონისძიების სახედ პატიმრობა მოითხოვა. როგორც პროკურორმა განაცხადა, არსებობდა მიმალვის, მტკიცებულებების განადგურების, დანაშაულის ჩადენისა და მოწმეებზე ზემოქმედების მოხდენის საფრთხე.

ადვოკატმა სასამართლოს გირაო 3 000 ლარის ოდენობით შესთავაზა. მისი თქმით, ბრალდებული აღიარებს წარდგენილ ბრალს, მან ითანამშრომლა გამოძიებასთან, რაც ადასტურებს, რომ არ არსებობს აღკვეთის ღონისძიების სახით პატიმრობის შეფარდების საფუძველი.

სასამართლოს სიტყვით მიმართა ბრალდებულმაც. მისი თქმით, აქციაზე შემთხვევით აღმოჩნდა და ანა სუბელიანისთვის ზიანის მიყენება არ დაუგეგმავს.

დანაშაული გამასწორებელი სამუშაოს, შინაპატიმრობას ან პატიმრობას ერთიდან სამ წლამდე ითვალისწინებს.

წინასასამართლო სხდომა 24 დეკემბერს 12:00 საათზე ჩაინიშნა.

8 ნოემბერს ქართული წარმოშობის შვედი რეჟისორის, ლევან აკინის ფილმის „და ჩვენ ვიცეკვეთ“ პრემიერა გაიმართა. ფილმის ჩვენება ჰომოფობიურმა, ძალადობრივმა ჯგუფებმა გააპროტესტეს.

დაკავებულია 27 პირი, ფილმის ჩვენებისას ოთხ ინციდენტზე მიმდინარეობს გამოძიება და ასევე, ფოტო-ვიდეომასალების დამუშავება.