თბილისის მერია 2016 წელს განათლების ხელშეწყობისათვის 2 მლნ. 500 ათასი ლარით მეტს დახარჯავს. ამის შესახებ დედაქალაქის მერმა დავით ნამრმანიამ განაცხადა.

„დედაქალაქის ერთ-ერთი მნიშვნელოვანი პრიორიტეტია განათლება და 2016 წლის ბიუჯეტში განათლების ხელშეწყობის მიმართულებით გამოყოფილია 95,1 მლნ. ლარი, რაც 2015 წლის მაჩვენებელზე  2 მლნ. 500 ათასი ლარით მეტია”, - განაცხადა დავით ნარმანიამ.  

მისივე თქმით, 106 800 ლარით გაიზარდა სახელოვნებო განათლების ხელშეწყობის პროგრამა.

“პროგრამას დაემატება ქალაქ თბილისის მერიის ხელოვნების სკოლებში იძულებით გადაადგილებულ მოსწავლეთა უფასო სწავლება”, - განაცხადა დედაქალაქის მერმა.  

შეგახსენებთ, რომ დედაქალაქის საკრებულომ 2016 წლის ბიუჯეტი დაამტკიცა. ბიუჯეტი 815 მლნ. 900 ათასი ლარით განისაზღვრა და პრიორიტეტებად კვლავ ინფრასტრუქტურის განვითარება, განათლება, ჯანდაცვა და სოციალური უზრუნველყოფა, ასევე, გამწვანებითი ღონისძიებები რჩება.