საქართველოში გამოვლენილი კორონავირუსის 314 ახალი შემთხვევიდან 225 აჭარას, 35 კი თბილისს უკავშირდება, - ამის შესახებ თბილისის ინფექციური საავადმყოფოს ბოქსირებული განყოფილების ხელმძღვანელმა მარინა ენდელაძემ განაცხადა.
დანარჩენი შემთხვევები სხვა რეგიონებზე ნაწილდება.

„დაემატა 314 ახალი პაციენტი. კვლავ ლიდერობს აჭარა 72 პროცენტით, ეს არის 225 შემთხვევა, თბილისში არის ცხრა პროცენტი – 35 პაციენტი, იმერეთში 22 შემთხვევა, სამეგრელო ზემო-სვანეთში -18, შიდა ქართლში – ცხრა, სამცხე ჯავახეთში – სამი, გურიაში – ერთი, ქვემო ქართლში – ერთი“, – განაცხადა ენდელაძემ.

ქვეყნის მასშტაბით ამჟამად მკურნალობას გადის 3 542 ინფიცირებული, მათგან 25-ის მდგომარეობა კრიტიკულია.

„25 არის კრიტიკული, აქედან 23 მართვით სუნთქვაზეა. მართვით სუნთქვაზე მყოფი პაციენტებიდან შვიდი ოკუპირებული აფხაზეთიდანაა გადმოყვანილი“, – აღნიშნა ენდელაძემ.