როგორ ბრძანდებით? კარგად ხართ? ჭავლები არა მავლები კიდევ , - ასე უპასუხა ინფექციური საავადმყოფოს სამედიცინო დირექტორმა მარინა ეზუგბაიამ "ფორმულას" შეკითხვას ცესკო-სთან აქციაზე წყლის ჭავლის გამოყენების ფაქტის შესახებ.

"თქვენ, როგორ ბრძანდებით? კარგად ხართ? რა ჩემი საქმეა პოლიტიკა. მე მკითხეთ კორონავირუსზე, ძალიან გთხოვთ, რა. ჭავლები არა მავლები კიდევ", - განაცხადა ეზუგბაიამ.

გუშინ მედიის შეკითხვებს მსგავსი შინაარსის პასუხები გასცეს ამირან გამყრელიძემ და თენგიზ ცერცვაძემაც.

მთავარი არხის ჟურნალისტის შეკითხვაზე, არის თუ არა ცივ კლიმატურ პირობებში, პანდემიის დროს, მომიტინგეების წინააღმდეგ წყლის ჭავლის გამოყენება საფრთხისშემცველი, ცენტრალური ინფექციური საავადმყოფოს დირექტორმა თენგიზ ცერცვაძემ უპასუხა:

"ვერ გეტყვით, იცით, ეპიდემიოლოგიური საკითხები დაავადებათა კონტროლის ეროვნული ცენტრის კომპეტენციაა და მათ უნდა კითხოთ, ჩემი კომპეტენცია არის ავადმყოფის მკურნალობა და თქვენ რასაც მეკითხებით, მაგაში ექსპერტად ვერ გამოვდგები", - ამბობს ცერცვაძე.

იმავე შეკითხვაზე დაავადებათა კონტროლის ეროვნული ცენტრის დირექტორმა ამირან გამყრელიძემ კი თქვა, რომ ეს პოლიტიკური შეკითხვა იყო და პასუხს არ გასცემდა.

"ამ ტიპის კითხვებზე მე პასუხს არ ვიძლევი, ქალბატონო. მე მკითხეთ, ქვეყანაში ეპიდსიტუაცია როგორია. რასაც თქვენ მეკითხებით, ეგ სხვა ტიპის პოლიტიკური კითხვაა. მე პოლიტიკურ კომენტარებს არ ვაკეთებ", - თქვა გამყრელიძემ.