გვერდითი მოვლენები ყველა მედიკამენტს და ვაქცინას აქვს, თუმცა ეს ძალიან იშვიათია ფაიზერის ვაქცინის დროს. ამის შესახებ "დღის კურიერის" ეთერში ინფექციური პათოლოგიებისა და შიდსის ცენტრის გენერალურმა დირექტორმა თენგიზ ცერცვაძემ განაცხადა.

მისი თქმით, საქართველო არის განვითარებადი ქვეყნების პირველ ხუთეულში, რომელიც ფაიზერის ვაქცინას მიიღებს.

"გვერდითი მოვლენები ყველა მედიკამენტს და ყველა ვაქცინას აქვს, თუმცა ეს გვერდითი მოვლენები ძალიან იშვიათია ამ ვაქცინის დროს. ის შეიძლება გამოვლინდეს ინექციის გაკეთების ადგილზე, წვის და ქავილის სახით, ასევე, შესაძლოა, ვაქცინა გაკეთებულმა ადამიანმა თავი შემდგომ დღეებში შეუძლოდ იგრძნოს.

ძალიან იშვიათ შემთხვევაში, შესაძლოა, იყოს მძიმე ფორმით ალერგიული ფონი, ანაფილაქსიური შოკი, რომელსაც თუ დროზე არ მივიღეთ ზომები, შესაძლოა, სიცოცხლესაც შეუქმნას საფრთხე.

მსოფლიოში, ჯერჯერობით, არცერთ განვითარებად ქვეყანას ეს ვაქცინა არ მიუღია. ჩვენი ქვეყანა არის პირველ ხუთეულში, განვითარებადი ქვეყნების, ვინც ამ ვაქცინას მიიღებს. ეს ჩვენი ქვეყნისთვის ძალიან კარგია.

პირველ რიგში, ეს ვაქცინა უნდა გაიკეთონ ექიმებმა, შემდეგ 75 წელს გადაცილებული პირები, შემდეგ 65 წელს გადაცილებული პირები და ა.შ სანამ არ მოხდება ჩვენი ქვეყნის 60%-ის ვაქცინაცია,"-აღნიშნა თენგიზ ცერცვაძემ.