სომხეთის პრემიერ მინისტრმა ნიკოლ ფაშინიანმა რესპუბლიკის მოედანზე შეკრებილ მხარდამჭერებს უთხრა, რომ ქვეყანაში რიგგარეშე საპარლამენტო არჩევნების თემა დღის წესრიგიდან მოხსნილია.

ფაშინიანის თქმით, მისი გადადგომის საკითხი სომეხმა ხალხმა უნდა გადაწყვიტოს.

„ჩემი წასვლის საკითხი მხოლოდ ხალხის გადასაწყვეტია“, - განაცხადა ფაშინიანმა. ამასთან აღნიშნა, რომ მოუწოდა ოპოზიციას განეხილათ რიგგარეშე საპარლამენტო არჩევნების თემა, თუმცა ოპოზიციამ რადიკალიზაციის გზა აირჩია. „მხოლოდ ხალხს შეუძლია ამ საკითხის გადაწყვეტა. დაე ხალხმა მოითხოვოს, დაე ხალხმა განმსაჯოს, თუნდაც დამხვრიტოს ამ მოედანზე“, -თქვა ფაშინიანმა.

შეგახსნებთ, სომხეთის შეირაღებული ძალების გენერალურმა შტაბმა ფაშინიანის გადადგომა მოითხოვა. ფაშინიანმა თანამდებობიდან გაათავისუფლა გენშტაბის უფროსი და მისი მოადგილე.

ერევანში ვითარება უკიდურესად დაძაბულია. სომხეთის დედაქალაქში ფაშინიანის მომხრეთა და მოწინააღმდეგეთა აქციები იმართება.