ბათუმელმა ჟურნალისტმა და ყოფილმა მიმტანმა, ტატო ცეცხლაძემ ფორმულას ეთერში განაცხადა, რომ 5 წლის წინ ბერა ივანიშვილი მასაც დაემუქრა.

მისი თქმით, კრიტიკული პოსტი მან ფეისბუქზე მაშინ დაწერა, როცა დროებით მიმტანად მუშაობდა და ბერა ივანიშვილს მოემსახურა, მან კი მიმტანს ე.წ თიფი - სერვისისთვის დამატებითი თანხა არ დაუტოვა.

"სტატუსის დაწერიდან ნახევარ საათში მოვიდა ობიექტის მფლობელი, მენეჯერი. მფლობელმა მთხოვა, წამეშალა სტატუსი. მე ვუთხარი უარი. ამის შემდეგ მას დაუკავშირდა უშიშროების წარმომადგენელი, ის მესაუბრა მერე, მერე მესაუბრა ბერა ივანიშვილი.

მან მითხრა, რომ როგორც მიმტანმა ჩავთვალე, რომ მილიონერის შვილს ვესაუბრებოდი და გადავწყვიტე ფულის გაკეთება, რომ ვიყავი პოლიტიკური პარტიების მიერ მიგზავნილი, რომ გამეკეთებინა ფული. მომაყენა ძალიან პირადი შეურაცხყოფა, ეხება ჩემი ოჯახის წევრებს. მითხრა, რომ თუ მე ამ ამბავს გავაგრძელებდი, მექნებოდა სერიოზული პრობლემები". - ყვება ცეცხლაძე.

მისივე თქმით, რამდენიმე დღის განმავლობაში უშიშროების სამსახურის წარმომადგენლები ურეკავდნენ, სტატუსის წაშლასა და მისგან ბოდიშის მოხდას მოითხოვდნენ. ასევე მისი თქმით, დაახლოებით 2 კვირის შემდეგ რესტორნის მფლობელმა ის სამსახურიდან გაათავისუფლა.

ტატო ცეცხლაძე ამჟამად აშშ-ში ცხოვრობს.

შეგახსენებთ, ტელეკომპანია "პირველის" ეთერში "ნოდარ მელაძის შაბათში" გავიდა სატელფონო საუბრის ჩანაწერი, სადაც, ავტორების მტკიცებით, პრემიერ-მინისტრი ირაკლი ღარიბაშვილი და ბიძინა ივანიშვილის შვილი, ბერა ივანიშვილი საუბრობენ. სატელეფონო საუბარში მონაწილეობს სახელმწიფო დაცვის სპეციალური სამსახურის უფროსი ანზორ ჩუბინიძეც.