ინდოეთში ყოველდღიურად კორონავირუსით ინფიცირების თითქმის 350 ათასამდე შემთხვევა ფიქსირდება. დედაქალაქ დელიში ყოველ ოთხ წუთში ერთი ადამიანი იღუპება. პრემიერ მინისტრმა ნარენდრა მოდიმ განაცხადა, რომ ქვეყანა კორონავირუსის შტორმის ეპიცენტრში იმყოფება.

კორონავირუსით გარდაცვლილი ადამიანების ცხედრებს პირდაპირ ქუჩებში წვავენ, კლინიკებში კი თავისუფალი საწოლები და ჟანგბადის ბალონები აღარ ჰყოფნით, ამიტომ ისინი პაციენტებს ვეღარ იღებენ.

კორონავირუსით ინფიცირებულთა საერთო რაოდენობამ 20 მლნ შეადგინა. ამ მაჩვენებლით ინდოეთი აშშ-ის შემდეგ მსოფლიოში მეორე ადგილს იკავებს.

„პირველ ტალღასთან წარმატებული ბრძოლის შემდეგ დარწმუნებულნი ვიყავით გამარჯვებაში, მაგრამ ამ ქარიშხალმა ერი შოკში ჩააგდო“, -  განაცხადა ინდოეთის პრემიერმა რადიომიმართვაში. დიდმა ბრიტანეთმა ინდოეთს 495 ჟანგბადის კონცენტრატორი, 120 არაინვაზიური აპარატი და 20 ხელოვნური სუნთქვის ხელის აპარატი გადასცა.

ბრიტანეთის პრემიერ მინისტრი ბორის ჯონსონი ინდოეთს დაპირდა, რომ ყველაფერს გააკეთებს იმისათვის,რომ დაეხმაროს. ევროკავშირმა ასევე განაცხადა, რომ ინდოეთში ჟანგბადის ბალონებსა და მედიკამენტებს გააგზავნის.

შეერთებული შტატები ინდოეთს დახმარებას დაპირდა და ქვეყანაში ჟანგბადის ბალონების, კორონავირუსის ტესტების, მედიკამენტებისა და ინდივიდუალური დაცვის საშულაებების გაგზავნას გეგმავს. პრეზიდენტის მრჩეველმა  უსაფრთხოების საკითხებში ჯეკ სალივანმა განაცხადა, რომ 24-საათიან რეჟიმში მუშაობენ, რათა ინდოეთს სამედიცინო დახმარება დროულად გაუწიონ.

აშშ-ის პრეზიდენტის უფროსმა მრჩეველმა მედიცინის საკითხებში ენტონი ფაუჩიმ განაცხადა, რომ აშშ ინდოეთში ვაქცინის დოზებს გაგზავნის და შესაბამის სამსახურებს დაეხმარება ინდოეთში ვაქცინების წარმოების დაწყებაში.