სულ მცირე 53 ადამინი დაიღუპა ღაზას სექტორში ისრაელის საპასუხო ავიაიერიშების შედეგად. მათ შორის 15 ბავშვი და სამი ქალია.  ადგილობრივი ჯანდაცვის უწყების განცხადებით, დაჭრილია კიდევ 320 ადამიანი. ისრაელის განცხადებით, ქვეყნის თავდაცვის ძალების სამიზნეებს ტერორისტების ობიექტები წარმოადგენს. მათივე ინფორმაციით, ღაზაში განადგურებულია ჰამასის სულ მცირე 18 ტერორისტი.

ისრაელის განცხადებით, ჰამასისა და ისლამის ჯიჰადის სარაკეტო დარტყმების შედეგად ქვეყნის ტერიტორიაზე მსხვერპლთა რაოდენობა 6-მდე გაიზარდა, დაშავებულია 200-ზე მეტი ადამიანი.

კონფლიქტის გამწვავებიდან ისრაელის მიმართულებით ჰამასმა და ისლამურმა ჯიჰადმა 1000-ზე მეტი რაკეტა ისროლეს.

ბოლო წლების უდიდესი ესკალაცია ღაზის სექტორის საზღვარზე ორშაბათს, 10 მაისს 18 საათის შემდეგ დაიწყო. 

დაძაბულობა იერუსალიმში, 8 მაისს, ალ-აკსას მეჩეთთან პალესტინელებისა და ისრაელის პოლიციის დაპირისპირებას მოჰყვა. გასულ დღეებში გავრცელდა ინფორმაცია იერუსალიმის შაიხ ჯარას რაიონიდან პალესტინელთა შესაძლო გასახლების შესახებ, რასაც ამ უკანასკნელთა პროტესტი მოჰყვა, რაც მასობრივ არეულობაში გადაიზარდა.