სომხეთის სამართალდამცავმა ორგანოებმა ქალაქ გიუმრიში განთავსებული 102-ე რუსული ბაზის სამხედრო მოსამსახურის წინააღმდეგ გამოძიება დაიწყეს. სომხური მედიის ცნობით, ჯარისკაცი ადგილობრივი მცხოვრების სახლში შეჭრას ცდილობდა.

მედიის ინფორმაციით, 26 წლის ჯარისკაცი სერგეი სურნიკოვი, რომელიც ალკოჰოლის ზემოქმედების ქვეშ იმყოფებოდა, ღამით ერთ-ერთი მცხოვრების სახლში შესვლას ცდილობდა, კარს ხელებსა და ფეხებს ურტყამდა და მის გაღებას მოითხოვდა. სახლის პატრონებმა პოლიცია გამოიძახეს. სამართალდამცავებმა ჯარისკაცი პოლიციის განყოფილებაში გადაიყვანეს.

როგორც სურნიკოვმა პოლიციაში განაცხადა, მას სახლი თავისი ნაცნობის საცხოვრებელ ბინაში აერია.

სომხეთში ამ დრომდე გრძელდება რუსი ჯარისკაცის ვალერი პერმიაკოვის სასამართლო პროცესი, რომელიც შვიდსულიანი ოჯახის მკვლელობაშია ბრალდებული. დანაშაული გიუმრიში 2015 წლის 12 იანვარს მოხდა.