აზერბაიჯანის მიერ კონფლიქტის დროს დაკავებული სომხეთის 15 მოქალაქის გათავისუფლებას საქართველოში სომხეთის საელჩო ეხმაურება და საქართველოს მთავრობას ძალისხმევისთვის მადლობას უხდის.

„მადლობა საქართველოს ხელისუფლებას სომეხი ტყვეების დაბრუნების საკითხში მათ მიერ გაწეული დახმარებისთვის“, – წერს საელჩო სოციალურ ქსელში.

აზერბაიჯანმა 15 სომეხი სამხედროს გათავისუფლება სომხური მხარის მიერ 97 000 ნაღმზე ინფორმაციის გაცემის სანაცვლოდ გადაწყვიტა.

საქართველოს პრემიერ-მინისტრ ირაკლი ღარიბაშვილის აქტიური ფასილიტაციისა და ევროპისა და ევრაზიის საკითხებში აშშ-ის სახელმწიფო მდივნის მოადგილის მოვალეობის შემსრულებლის, ფილიპ რიკერის ჩართულობით, აზერბაიჯანულმა მხარემ კონფლიქტის დროს დაკავებული სომხეთის 15 მოქალაქე გაათავისუფლა და, საქართველოს ტერიტორიის გავლით, ისინი საკუთარ ოჯახებს დაუბრუნდნენ.