საქართველოს ნატოში გაწევრიანების პოლიტიკური საკითხი გაყინა თავად საქართველომ. ასეთია რეალობა და მდგომარეობის სხვაგვარად აღწერა იქნებოდა შეცდომა და თანაც, ძალიან სერიოზული, – განაცხადა ევროპული საქართველოს ერთ-ერთმა ლიდერმა გიორგი კანდელაკმა ნატო-ს ბრიუსელის სამიტის კომუნიკეს შესახებ.

"როგორც ჩანს ამ სამიტის კომუნიკედან, ნატოში გაწევრიანების კონტექსტში ამ სამიტიდან საქართველომ ვერ მიიღო ვერაფერი. აბსოლუტურად ვერაფერი. ჩვენში გავრცელებულია აზრი და საქართველოს მხარდამჭერებს შორისაც, რომ შეიძლება ისე ინტენსიურად არა, როგორც წინა ხელისუფლების დროს, მაგრამ საქართველო მაინც ცდილობს, წინ წაიწიოს ნატოში გაწევრიანების საკითხზე". – თქვა კანდელაკმა

მისი თქმით, ის, რომ ნატოში გაწევრიანების დღის წესრიგში დაყენებას გერმანიის პოზიციები უშლის ხელს, უკვე დიდი ხანია რეალობას აღარ ასახვს.

"სამწუხაროდ, დიდი ხანია მდგომარეობის ასეთი აღწერა რეალობას აღარ ასახავს. მართალია, გერმანიის დაყოლიება მართლაც რთული საკითხია, მაგრამ 2014 წლის შემდეგ, როცა დასავლეთის დამოკიდებულება უკრაინის ამბების გამო რუსეთის მიმართ შეიცვალა, ეს საკითხი ბევრად ნაკლებად რთული გახდა, ვიდრე ადრე". – ამბობს კანდელაკი

მისი თქმით, გერმანიის დაყოლიებისთვის საჭიროა საქართველოს მხრიდან აქტიური დიპლომატია და ძლიერი ლობირება ნატოს ყოველი სამიტის წინ, რაც მისი თქმით, დიდი ხანია აღარ ხდება.