ირანის ისლამურ რესპუბლიკაში საპრეზიდენტო არჩევნები მიმდინარეობს.

საარჩევნო უბნები დილის 07:00 საათზე გაიხსნა.

საპრეზიდენტო არჩევნებში პრეზიდენტობის 4 კანდიდატი მონაწილეობს.

გამოკითხვების თანახმად, არჩევნებში აშკარა ფავორიტად ებრაჰიმ რაისი, მკაცრი კონსერვატორი, შიიტი სასულიერო პირი მიიჩნევა, რომელიც ამჟამად ირანის მართლმსაჯულების სისტემას განაგებს. ამასთან, ებრაჰიმ რაისი ირანის უზენაესი ლიდერის კეთილგანწყობით სარგებლობს.

ზომიერი კონსერვატორი, ცენტრალური ბანკის ყოფილი მმართველი აბდოლნასერ ჰემათი მისი მთავარი კონკურენტია.

დანარჩენი კანდიდატები არიან მოჰსენ რეზაი - 66 წლის პოლიტიკოსი, ირანის ზედამხედველობის საბჭოს მდივანი, რომელიც უზენაეს ლიდერს ირჩევს და ამირჰოსეინ ქაზიზადე ჰაშემი - ქირურგი, 2008 წლიდან ირანის პარლამენტის წევრი და ამ წლის მაისიდან სპიკერის პირველი მოადგილე.

საპრეზიდენტო არჩევნებში საკუთარი ხმა უკვე დააფიქსირა ირანის უზენაესმა ლიდერმა აიათოლა ალი ხამენეიმ და მოუწოდა მოქალაქეებს, მონაწილეობა მიიღონ არჩევნებში და გამოხატონ თავიანთი ნება.

არჩევნებში ხმის უფლების მქონე 52 მილიონზე მეტი მოქალაქე მონაწილეობს. საარჩევნო უბნები გახსნილია საზღვარგარეთაც - 133 ქვეყანაში 234 საარჩევნო უბანი.

ირანის ამჟამინდელი პრეზიდენტი, ჰასან როჰანი ორი ვადის განმავლობაში მსახურობდა ამ თანამდებობაზე.