გერმანიის ჯანდაცვის მინისტრი იენს შპანი აცხადებს, რომ ქვეყანაში კორონავირუსით ინფიცირების ინდიკატორები უახლოეს კვირებში, შესაძლოა, კვლავ მკევთრად გაიზარდოს. მისი თქმით, თუ კორონავირუსის გავრცელების ახლანდელი ტენდენცია შენარჩუნდება, შვიდ დღეში ინფიცირებულთა რაოდენობა 100 ათასით გაიზრდება, რაც გერმანიაში საკვანძო მაჩვენებლად მიიჩნევა ეპიდემიოლოგიური სიტუაციის შესაფასებლად, სექტემბრისთვის 400-მდე, ოქტომბრისთვის კი 800 ათასამდე გაიზრდება.

შპანი აღნიშნავს, რომ დღეისათვის, გერმანიაში ახალი ინფიცირების დონე ჯერ კიდევ „შედარებით დაბალ“ზღვარზეა, მაგრამ ძირითადი მაჩვენებლის მნიშვნელობა ყოველ 10-12 დღეში ორმაგდება. როგორც მინისტრი ამბობს, თუ მოცემული ტენდენცია არ გადატყდება, ქვეყანას ინფიცირებულთა რიცხვის ახალი ექსპონენციალური ზრდა ემუქრება.

რობერტ კოხის ინსტიტუტის მონაცემებით, 21 ივლისს, გერმანიაში, ინფიცირების ახალი შემთხვევების რაოდენობამ ბოლო შვიდ დღეში 100 ათას ადამიანზე საშუალოდ შეადგინა 11,4. წინა დღეს ეს მაჩვენებელი შეადგენდა 10,9-ს. ყველაზე დაბალი მაჩვენებელი კი მესამე ტალღის დასასრულს, 6 ივლისს დაფიქსირდა - 4,9.

შპანი მოუწოდებს აღნიშნული მაჩვენებელი შემოდგომამდე შენარჩუნდეს. „მაგრამ ეს თავისით არ მოხდება“, - ამბობს ის. მინისტრის თქმით, კვლავ აუცილებელია წესების დაცვა, ნიღბების ტარება, სოციალური დისტანციის დაცვა და ვაქცინაციის გაგრძელება.

ამ დროისათვის, გერმანიაში 59 მილიონზე მეტი ადამიანი (60,2 პროცენტი), ვაქცინის ერთი დოზით არის აცრილი, ხოლო 39,3 მლნ  (47,3 პროცენტი) ორი დოზით.