პეკინი მკაცრად ეწინააღმდეგება ჯანმრთელობის მსოფლიო ორგანიზაციის მიერ შემოთავაზებულ გეგმას, ჩინეთში კორონავირუსის წარმოშობის გამოძიების მეორე ეტაპის ჩატარებასთან დაკავშირებით. ამის შესახებ ჩინეთის სახალხო რესპუბლიკის ჯანმრთელობის სახელმწიფო კომიტეტის ხელმძღვანელის მოადგილემ განაცხადა.

მისი თქმით, ჯანმრთელობის მსოფლიო ორგანიზაციის მიერ შემოთავაზებული გეგმა "უარყოფს მეცნიერებას".მისივე თქმით, პეკინი კატეგორიულად ეწინააღმდეგება ვირუსის წარმოშობის შესახებ კვლევის პოლიტიზირებას.

კორონავირუსის წარმოშობის მეორე ეტაპი ითვალისწინებს ჩინეთის ქალაქ უხანში არსებული ლაბორატორიების შემოწმებას და სასურსათო ბაზრების სიღრმისეულ კვლევას.

ჯანმრთელობის მსოფლიო ორგანიზაციის მიერ ჩატარებულ გამოძიების პირველ ეტაპზე, სარწმუნოდ მიიჩნევდნენ ვერსიას, რომ კორონავირუსი ცხოველური წარმოშობისა იყო. ორგანიზაცია უარყოფდა ვერსიებს, რომ შესაძლოა ვირუსი ლაბორატორიიდან გავრცელებულიყო.

ჯანდაცვის მსოფლიო ორგანიზაციის (WHO) ხელმძღვანელმა, თედროს ადანომ ღებრეიესუსმა, ივნისში აღიარა, რომ ვერსია ვირუსის ჩინეთის ლაბორატორიიდან გაჟონვასთან დაკავშირებით ძალიან ადრე გამოირიცხა.

მანამდე გავრცელდა ცნობა, რომ ბრიტანეთი ვირუსის ლაბორატორიიდან გავრცელების ვერსიას შესაძლებლად მიიჩნევდა.

მიმდინარე წლის მაისში აშშ-ის პრეზიდენტმა ჯო ბაიდენმა დაავალა აშშ-ს სადაზვერვო სააგენტოებს "გაორმაგდეს ძალისხმევა" კორონავირუსის წარმოშობის წყაროს დასადგენად.

ჯანმრთელობის მსოფლიო ორგანიზაციამ მარტში გამოაქვეყნა უხანის ლაბორატორიაში წარგზავნილი საერთაშორისო ექსპერტების ანგარიშის სრული ვერსია. ანგარიშის თანახმად, SARS-CoV-2-ის გაჟონვა ლაბორატორიიდან უკიდურესად ნაკლებსავარაუდო იყო.

ანგარიშში ასევე ნათქვამია, რომ კორონავირუსი შესაძლოა, ადამიანს ღამურისგან სხვა ცხოველის საშუალებით გადასდებოდა.

პეკინი უხანის ლაბორატორიიდან ვირუსის გავრცელების ვერსიას კატეგორიულად უარყოფს.