„გირჩის“ წევრი ალექსანდრე რაქვიაშვილი ამბობს, რომ  ოპოზიციური კანდიდატის დაყენება შეცდომაა და კარგია, რომ მელიას ირგვლივ ფართო გაერთიანება არ მოხდა.


მისივე თქმით, თბილისში კახა კალაძის დასამარცხებლად საჭიროა მეორე ტურის გამართვა და ამისთვის მნიშვნელოვანია სწორედ კანდიდატთა მრავალფეროვნება.

ალექსანდრე რაქვიაშვილის შეფასებით, „ნაციონალური მოძრაობას“ სურს, დარჩეს უალტერნატივო ოპოზიციური ძალად, რაც ყველაზე ცუდი შედეგი შეიძლება, იყოს.

„ჩემი აზრით, ერთიანი ოპოზიციური კანდიდატის დაყენება შეცდომაა და ძალიან კარგია, რომ მელიას ირგვლივ ფართო გაერთიანება არ მოხდა, რადგან ერთადერთი შანსი, რომ დავამარცხოთ კახი კალაძე თბილისში არის, ყველაფერი მეორე ტურში გადავიყვანოთ. და თუ „ქართული ოცნება“ პირველ ტურში ცუდ შედეგს დადებს, მაშინ მეორე ტურში შანსი გაჩნდება, რომ ოპოზიციამ გაიმარჯვოს. ამიტომ, მნიშვნელოვანია მრავალფეროვნება.

ამ მომენტისტვის, მე რასაც ვაკვირდები, „ნაციონალური მოძრაობის“ ტაქტიკა უფრო იმაში მდგომარეობს, რომ სხვა ოპოზიციური პარტიები ან გაანადგუროს, ან შეიწოვოს და მიუხედავად შესაძლო დამარცხებისა, დარჩეს როგორც უალტერნატივო ოპოზიციური ძალა, რაც ჩემი აზრით ყველაზე ცუდი შედეგი შეიძლება იყოს, რადგან ჩვენ ვიცით, რომ „ქართული ოცნების“ და „ნაციონალური მოძრაობის“ დაპირისპირებაში „ქართული ოცნება“ გაიმარჯვებს“, – განაცხადა ალექსანდრე რაქვიაშვილმა.