სალვადორი მსოფლიოში პირველი ქვეყანაა, სადაც ბიტკოინი გადახდის ოფიციალური საშუალება გახდა.

უკვე დღეიდან, სალვადორის მოქალაქეებს შეუძლიათ კრიპტოვალუტის გამოყენება, რათა შეიძინონ ერთი ჭიქა ყავა ან გადაიხადონ მომსახურების საფასური. ამის გარდა, მათ შეუძლიათ გადაიხადონ გადასახადები და კრიპტოვალუტა იპოთეკის დასაფარად გამოიყენონ. წერს The Wall Street Journal.

ხელისუფლება აპირებს გაშალოს 200 ბიტკოინის ბანკომატების ქსელი, სადაც შესაძლებელი იქნება კრიპტოვალუტის მიღება.

ექსპერტები აღნიშნავენ, რომ ბიტკოინის აღიარება გადახდის ოფიციალურ საშუალებად სალვადორისთვის ბევრ რისკს შეიცავს. კრიპტოვალუტის მაღალმა არასტაბილურობამ, შესაძლოა, გამოიწვიოს ბიუჯეტში საგადასახადო შემოსავლების შემცირება და ქვეყნის სავალუტო რეზერვების დაწევა. ამასთან, ხელისუფლებას არ აქვს არც ინსტრუმენტები და არც ფინანსური რესურსები სპეკულაციური შეტევების აღსაკვეთად.

სალვადორის ხელისუფლება ფიქრობს, რომ ბიტკოინის ფართოდ გამოყენება შექმნის ხელმისაწვდომ ფინანსურ მომსახურებას ქვეყანაში, სადაც ძირითადად მისაღებია ნაღდი ანგარიშსწორება. ინიციატივას მხარს უჭერს ადგილობრივი ბიზნესიც, რადგან ის აფართოვებს პროდუქციის გადახდისა და მომსახურების ვარიანტების წრეს.