„თალიბანის“ ერთ-ერთი დამფუძნებელი ჰაიბათულა ახუნძადა აცხადებს, რომ ავღანეთში შარიათის კანონი იმოქმედებს.

„მომავალში, ავღანეთში ცხოვრების წესის მმართველობის ყველა საკითხი წმინდა შარიათის კანონებით დარეგულირდება“, - ნათქვამია ახუნძადას განცხადებაში.

„ჩვენ გვსურს ძლიერი და ჯანსაღი ურთიერთობები მეზობლებთან და სხვა ქვეყნებთან, რომელიც დაფუძნებული იქნება პატივისცემასა და ურთიერთთანამშრომლობაზე. ამ ქვეყნებთან ჩვენი ურთიერთობები დაფუძნებული იქნება ავღანეთის ინტერსებსა და სარგებელზე. ჩვენ ერთგულნი ვართ ყველა საერთაშორისო კანონებისა და შეთანხმებების, რეზოლუციებისა და ვალდებულებების, რომლებიც არ ეწინააღმდეგება ისლამის კანონებსა და ეროვნულ ღირებულებებს“, - ნათქვამია ახუნძადას განცხადებაში.

 „ისლამური საამირო“ გადადგამს სერიოზულ და ეფექტიან ნაბიჯებს ადამიანის უფლებების დაცვის კუთხით, დავიცავთ უმცირესობებისა და ღარიბი მოსახლეობის უფლებებს ისლამის წმინდა რელიგიიის მოთხოვნების ფარგლებში“, - ამბობს ახუნძადა.

დღეს, "თალიბანმა", ახალი დროებით მთავრობის შემადგენლობა დაასახელა.

ავღანეთის ახალ მთავრობას, დროებითი პრემიერ-მინისტრის რანგში, უხელმძღვანელებს "თალიბანის" ერთ-ერთი დამფუძნებელი და გაეროს შავ სიაში მყოფი მულა მოჰამედ ჰასან ახუნდი.

პრემიერ-მინისტრის მოადგილე იქნება "თალიბანის" ერთ-ერთი დამფუძნებელი და მოძრაობის პოლიტიკური ფრთის ლიდერი მოლა აბდულ ღანი ბარადარი.

შინაგან საქმეთა მინისტრის პოსტს შეერთებული შტატების გამოძიების ფედერალური ბიუროს მიერ ძებნილი სირაჯუდინ ჰაყანი ჩაიბარებს.

თავდაცვის მინისტრი იქნება მოჰამედ იაყუბი, თალიბანის დამფუძნებლის, მოლა მუჰამედ ომარის ვაჟი. ხოლო საგარეო საქმეთა მინისტრის მოვალეობას ამირ ხან მუთაქი შეასრულებს.