თბილისის მერი კახა კალაძე ამტკიცებს, რომ საქართველოში მოქმედ დიპლომატებს არავინ უსმენდა.

მისი თქმით, უნდა დაველოდოთ გამოძებას, რომელიც ყველა კითხვას პასუხს გასცემს.

"უნდა დაველოდოთ გამოძიებას და გაირკვეს, რა არის ტყუილი და რა – მართალი. დიპლომატებს არავინ არ უსმენდა, ამას ხაზგასმით ვამბობ და კიდევ ერთხელ გამოძიება დაადგენს ყველაფერს",- აღნიშნა კალაძემ.

ამასთან, კახა კალაძემ განაცხადა, რომ არ ფლობს ინფორმაციას, ფარულ ჩანაწერებთან დაკავშირებით ევროკავშირში საქართველოს ელჩის ბრიუსელში დაბარებასთან დაკავშირებით.

კარლ ჰარცელის განცხადებით, სახელმწიფო უსაფრთხოების სამსახურის სავარაუდო ფარულ ჩანაწერებთან დაკავშირებით, ევროკავშირში საქართველოს დიპლომატიური მისიის ხელმძღვანელი, ვახტანგ მახარობლიშვილი ბრიუსელში, ევროკავშირის ოფისში დაიბარეს.

შეგახსენებთ, მედიაში გავრცელებული სუს-ის სავარაუდო ფარული ჩანაწერების თანახმად ირკვევა, რომ ფარული მიყურადება ხორციელდებოდა ევროკავშირის ელჩის, ისრაელის ელჩის, ამერიკის, გერმანიისა და ესტონეთის საელჩოს თანამშრომლების მიმართ. ჩანაწერების ავთენტიკურობა დადასტურებული არ არის.

პროკურატურამ, სავარაუდოდ, სუს-ის მერ მომზადებულ ჩანაწერებთან დაკავშირებით გამოძიება კერძო კომუნიკაციის საიდუმლოების დარღვევის ფაქტზე დაიწყო.