რუსეთის მიერ საქართველოს ოკუპირებულ ტერიტორიებზე საარჩევნო უბნების გახსნა პარტნიორმა სახელმწიფოებმა ეუთოს მუდმივ საბჭოზე დაგმეს.

23 სექტემბერს, ეუთოს მუდმივ საბჭოზე რუსეთში ჩატარებული არჩევნების განხილვისას, პარტნიორმა სახელმწიფოებმა გააკეთეს დამგმობი განცხადებები რუსეთის მიერ საქართველოს ოკუპირებულ აფხაზეთისა და ცხინვალის რეგიონებში არჩევნების გამართვის თაობაზე.

17-19 სექტემბერს რუსეთში ჩატარებული არჩევნებისას გამოვლენილი დარღვევების შესახებ განცხადება ევროკავშირის დელეგაციამ გააკეთა, რასაც საქართველოს დელეგაციის მხრიდან მოჰყვა დაგმობითი კომენტარი რუსეთის მიერ ოკუპირებულ ტერიტორიებზე საარჩევნო უბნების გახსნასთან დაკავშირებით. თავიანთ განცხადებებში საქართველოს ოკუპირებულ რეგიონებში არჩევნების ჩატარების საკითხი ახსენეს აშშ-ის, ბრიტანეთის, მოლდოვისა და უკრაინის დელეგაციებმაც.

აშშ-ის დელეგაციის გამოსვლაში ითქვა, რომ ის გმობს "რუსეთის გადაწყვეტილებას, მოეწყო კენჭისყრა საქართველოს, მოლდოვისა და უკრაინის ტერიტორიებზე ამ მთავრობების თანხმობის გარეშე და კიდევ ერთხელ ადასტურებს ურყევ მხარდაჭერას ამ ქვეყნების სუვერენიტეტისა და ტერიტორიული მთლიანობისადმი".

ასევე, ეუთოს მუდმივ საბჭოზე აშშ-ის დელეგაციის გამოსვლას ტვიტერის საკუთარ გვერდზე გამოეხმაურა აშშ-ის სახელმწიფო დეპარტამენტის პრეს-სპიკერი ნედ პრაისი, რომელიც წერს: "შეერთებული შტატები სწუხს რუსეთის რეპრესიული ქმედებების გამო, რომლებმაც შეაფერხა დუმის არჩევნების თავისუფლება, სამართლიანობა და სანდოობა და ჩვენ ვგმობთ რუსეთის საარჩევნო უბნების ორგანიზებას საქართველოს, მოლდოვისა და უკრაინის ტერიტორიებზე, მათი თანხმობის გარეშე".