შეიძლება უკეთესიც იყოს, რომ ერთხელ და სამუდამოდ დაისვენოს ჩვენმა ქვეყანამ და სააკაშვილმაც დაისვენოს ციხეში ჩასმით, -  ამის შესახებ პრემიერ-მინისტრმა, ირაკლი ღარიბაშვილმა ტელეკომპანია „იმედის“ გადაცემაში „არჩევნები 2021“ განაცხადა.

„​მე ერთხელ ვთქვი და მინდა გავიმეორო, შეიძლება უკეთესიც იყოს, რომ ერთხელ და სამუდამოდ დაისვენოს ჩვენმა ქვეყანამ და სააკაშვილმაც დაისვენოს ციხეში ჩასმით. ერთ ფაქტს შევახსენებ მოსახლეობას, ეს ვიცი დარწმუნებით, როდესაც სააკაშვილი უკრაინაში ჩასვეს ციხეში, მან 24 საათი ვერ გაძლო საკანში. ჩემი უკრაინელი მეგობრები, კოლეგები მიყვებოდნენ, რომ შეეშინდათ არ გაგიჟებულიყო, რადგან ვერ გაძლო 24 საათიც კი საკანში და იმავე დღეს მიმართა პრეზიდენტ პოროშენკოს შეწყალების თხოვნით. ასეთ კაცთან გვაქვს ჩვენ საქმე. შეგახსენებთ მის სიმხდალეს ომის დროს. ზოგადად ასეთი ფსიქიკის ადამიანის ქცევაზე, ჩვენ დიდი დრო არ უნდა დავხარჯოთ", - თქვა ღარიბაშვილმა.