აშშ-ში სახელმწიფო დეპარტამენტში განაცხადეს,რომ  თურქეთისგან განმარტებებს ელიან რამდენიმე ქვეყნის, მათ შორის შეერთებული შტატების ელჩების გაძევების შესახებ მიღებული გადაწყვეტილების გამო.

„ჩვენ გავეცანით, ამ ინფორმაციას და განმარტებებს ველით თუქრეთის საგარეო საქმეთა სამინისტროსგან“,- განაცხადეს სახელმწიფო დეპარტამენტში.

პრეზიდენტმა რეჯებ თაიფ ერდოღანმა განაცხადა, რომ უფლებადამცველ ოსმან კავალას მხარდაჭერისა და მისი გათავისუფლების მოთხოვნის გამო ნონ გრატად აცხადებს აშშ-ის საფრანგეთის, კანადის, ფინეთის, ნიდერლანდების, ნორვეგიის, დანიის, ახალი ზელანდიის, გერმანიისა და შვედეთის ელჩებს.

ორშაბათს, 18 ოქტომბერს, გერმანიის, დანიის, კანადის, ნიდერლანდების, ახალი ზელანდიის, ნორვეგიის, აშშ-ის, ფინეთის, საფრანგეთისა და შვედეთის ელჩებმა გამოაქვეყნეს ერთობლივი განცხადება, რომელიც შეიცავს მოწოდებას თურქეთის ხელისუფლებისადმი „დაუყოვნებლივ და სამართლიანად გადაწყვიტიოს კავალის საკითხი“. ელჩები აღნიშნავდნენ, რომ აქტივისტის ხანგრძლივი დაკავება თურქეთს ჩრდილს აყენებს.

ამის შემდეგ თურქეთის საგარეო საქმეთა მინისტრმა ელჩები დაიბარა და დიპლომატიური ურთიერთობის შესახებ ვენის კონვენიის დაცვის აუცილებლობა შეახსენა.

ორი დღის წინ ერდოღანი კავალას მხარდაჭერის გამო ელჩებს ქვეყნიდან გაძევებით დაემუქრა.

ოსმან კავალა ცნობილი თურქი უფლებადამცველია, რომელიც პარიზში ცხოვრობს. მას ბრალად ედებოდა ხელისუფლების დამხობის მცდელობასთან კავშირი 2013 წელს  სტამბოლის გეზის პარკში საპროტეტსო აქციების საქმეზე. 2020 წლის თებერვალში თურქეთის სასამართლომ კავალა გაამართლა, მაგრამ სტამბოლის პროკურატურამ იმავე დღეს მის დაპატიმრებაზე ორდერი გასცა. კავალას ამჯერად 2016 წლის ივლისში სახელმწიფო გადატრიალების მცდელობის მონაწილეობაში დასდეს ბრალი.