როცა მამუკა ხაზარაძემ გადაწყვიტა, დათანხმებულიყო მერობის მოადგილის კანდიდატობას, მაშინ მიიღო პარლამენტის დატოვების გადაწყვეტილება, - ამის შესახებ „ლელოს“ ლიდერმა ბადრი ჯაფარიძემ განაცხადა.

მისი თქმით, მამუკა ხაზარაძე აპირებს, გააგრძელოს კოალიციის გაძლიერება-გაფართოვებაზე მუშაობა პარლამენტს გარეთ. ამასთან, მისივე თქმით, პარლამენტში დარჩენილებიც ასევე გააგრძელებნ აქტიურ პოლიტიკურ საქმიანობას და ამისთვის პარლამენტის ტრიბუნის გამოყენებას.

„დავინახეთ, რომ კოალიციის მიმართ პოზიტიური დამოკიდებულებაა, ეს უნდა გაფართოვდეს და გაძლიერდეს. ვაპირებთ, წინააღმდეგობა გავუწიოთ იმ უმსგავსობას, რაც 30 oქტომბერს ვნახეთ. ეს წინააღმდეგობა იქნება პარლამენტის შიგნით, მის გარეთ. პარლამენტში ვინც ვრჩებით, ვაპირებთ ჩვენი აქტიური საქმიანობა გავაგრძელოთ, რომ ყველა ის ინიციატივა, რომელიც გამომდინარეობდა შარლ მიშელის შეთანხმებიდან, ეს საკითხები წამოვწიოთ. ვაპირებთ, პარლამენტის ტრიბუნა ძალიან აქტიურად გამოვიყენოთ.

როცა მამუკამ გადაწყვიტა, დათანხმებულიყო მერობის მოადგილის კანდიდატობას, მაშინ მიიღო ეს გადაწყვეტილება, რომ პარალამენტს დატოვებდა, რაც გუშინ გაახმაურა, გაასაჯაროვა. ჩვენი ამოცანაა, ფრაქცია გაფართოვდეს და გაძლიერდეს“, – განაცხადა ბადრი ჯაფარიძემ.

პარტია „ლელოს“ ლიდერმა, მამუკა ხაზარაძემ გუშინ განაცხადა, რომ საქართველოს პარლამენტს ტოვებს.