ოპოზიციონერმა დეპუტატმა, სანდრო რაქვიაშვილმა განაცხადა, რომ ვერც "ქართული ოცნებისა" და ვერც "ნაციონალური მოძრაობისგან"  მიიღო დამაჯერებელი ინფორმაცია, როგორია მიხეილ სააკაშვილის ჯანმრთელობის მდგომარეობა.

მისი თქმით, ახლა წარმოუდგენელია მიხეილ სააკაშვილის ციხიდან გამოყვანა და იმედს გამოთქვამს, რომ „ქართული ოცნება“ მას უკრაინაში გაუშვებს.

"ვერ მივიღე დამაჯერებელი ინფორმაცია როგორ მდგომარეობაშია მიხეილ სააკაშვილი, არც „ქართული ოცნების“ ინფორმაცია არ არის დამაჯერებელი და არც „ნაციონალური მოძრაობის“. ალბათ, კარგი იქნებოდა, რაიმე სანდო ინფორმაციის წყარო გვქონდეს. 90-იანი წლებიდან მოყოლებული კარვები, შიმშილი და აქციები ემოციურად ჩემთვის მისაღები არ არის, ეს უკიდურესი ფორმაა, მაგრამ ამას რაღაც სერიოზული მიზეზიც უნდა ჰქონდეს. სინამდვილეში, ასეთ მიზეზს ვერ ვხედავ, მივიჩნევ, რომ ისეთი პოლიტიკური სიტუაცია არ გვაქვს, რომ შიმშილობას მივბაძოთ.

იმედია, ვითარება დამშვიდდება. ეს ნეგატიური ფონი არ მომწონს, რაც შექმნილია და იმედია, შეიცვლება. გასაგებია, რომ მიხეილ სააკაშვილის გათავისუფლების საკითხი „ნაციონალურ მოძრაობას“ აღელვებს და ამის გამო საპროტესტო აქციები ტარდება, მაგრამ ახლა მისი ციხიდან გამოყვანა წარმოუდგენელია, თუმცა ეს არის პოლიტიკური პრობლემა და პოლიტიკურად უნდა მოგვარდეს. იმედია, „ქართული ოცნება“ მიმართვას დაუჯერებს და მას უკრაინაში გაუშვებს“,- განაცხადა რაქვიაშვილმა.